Ютазы районының төп сәхнәсендә – хезмәт алдынгылары
Туган җиребез кырларыннан 60 мең тоннадан артык ашлык җыеп алган Ютазы илендә тантана – бүген ул үзенең фидакарь хезмәт куйган улларын һәм кызларын хөрмәтләде.
Сәхнәгә бер-бер артлы алдынгы игенчеләр, терлекчеләр, сәнәгать тармагы белгечләре, хезмәт династияләре, җәйге каникулда өлкәннәргә ярдәмгә килгән укучылар күтәрелде. Җитештерү тармагы алдынгыларын район башлыгы Рөстәм Нуриев, тантана кунагы - республика Авыл хуҗалыгы һәм азык-төлек министрлыгы белегече Ришат Зарипов тәбрик итте. “Данон Россия” җәмгыяте вәкиле Камил Хаҗиев та бәйрәмгә буш кул белән килмәгән булып чыкты – ул тырыш терлекчеләргә кыйммәтле бүләкләр тапшырды. Ә инде район мәдәният йорты артистлары башкарган концерт номерлары, Октябрьский шәһәреннән килгән “Ритмы-Беби” эстрада биюләре ансамбле чыгышы залда утырган һәркемгә бәйрәм бүләге булып барып иреште.