Язгы чакырылыш көне

Армиядә хезмәт итү елдан ел престижлырак була бара, дип үзенең чыгышында район Башкарма комитет җитәкчесе Андрей Подовалов билгеләп узды. Шуңа күрә күп кенә егетләр Россия армиясе сафларына барырга үзләре үк ашкынып торалар. “Сез бу мәктәпне узарга тиеш, - дип ассызыклады Андрей Николаевич, - армиядә вакытта алган үзлекләр сезгә тынч тормышта да кирәк булуы ихтимал. ТР хәрби комиссариаты бүлегенең Баулы шәһәре Баулы һәм Ютазы районнары начальнигы Ильшат Хәлитов сүзләренә краганда, хәзер солдатлар элеккеге кебек урам җыештыру, казарма һәм туалет юу белән шөгыльләнмиләр. Бер ел дәвамында алар бары тик хәрби әзерлек белән генә шөгыльләнәләр. Ләкин, егетләр, - дип искәртте Хәлитов, - сезнең өскә бик күп җаваплылык төшкәнен аңлагыз. Чөнки сезгә сезнең бабаларыгыз җиде ел, ә әтиләрегез ике ел эчендә өйрәнгәннәрне бер ел эчендә үзләштерергә туры киләчәк. БВС ветераннары район советының президиум әгъзасы, районда яшьләргә патриотик тәрбия бирү өчен җаваплы Всеволод Орехов та шундый ук фикердә. Моннан тыш, чакырылыш комиссиясе эше турында үз тәэсирләре белән дә уртаклашты: “Бу елда сездән- армиягә чакырылучылардан, үз теләгем белән армиягә барам дигән сүзләр ишетү рәхәт булды”. Булачак солдатларга Бөек Ватан сугышы ветераны, хәрби сугышта катнашучы Миннебай Миннекәев та мөрәҗәгать итте. Ул аларга исән-имин хезмәт итүләрен һәм тизрәк туган ягыбызга әйләнеп кайтуларын теләде. Үзләренең музыкаль котлауларын, теләкләрен һәм бәйгеләрен район мәдәният йорты артистлары әзерләгән иде, ә “Ютазы йолдызлары” халык бию ансамбле энергияле биюләре белән сөендерделәр.

Бу көнне дүрт егет военком кулыннан беренче чакыру кәгазьләрен алдылар. Казаннан алар инде армия сафларына 13 майда ук кузгалакчаклар. Сүз уңаенда, берничә көн элек безнең районнан ике егет армиягә киттеләр инде. Аларга көч, уңышлар һәм тизрәк туган ягыбызга әйләнеп кайтуларын теләп калыйк!