Урыссудагы 3 санлы мәктәпнең 4а сыйныф укучылары өчен "Бар да китапханә тирәсендә" дигән квест-уен үткәрелде
Бөтенроссия китапханәләр көне алдыннан, 26 майда, Үзәк балалар китапханәсе һәм Үзәк китапханә хезмәткәрләре Урыссудагы 3 санлы мәктәбенең 4а сыйныф укучылары өчен "Бар да китапханә тирәсендә” дип аталган квест-уен үткәрделәр.
Балалар тылсымлы китап дөньясына мавыктыргыч сәяхәт ясадылар. Хезмәткәрләр бай күңел ачу һәм танып-белү программасы әзерләгәннәр. Балалар бик теләп табышмакларга җавап бирделәр, шарадлар чиштеләр, викторина сорауларына җавап бирделәр, әкият геройларының исемнәрен ачыкладылар, әкиятләрнең исемнәрен таптылар. Балалар рәхәтләнеп «Шалкан» театр - экспромында катнаштылар. Укучылар Үзәк китапханәнең уку залы белән таныштылар, анда аларны Баба-Яга әкият персонажы каршы алды. Ул балалар белән «Табылдыклар бюросы» уенын үткәрде һәм балалар белән кечкенә үрдәкләр биюен биеде. Бу гадәти булмаган һәм мавыктыргыч сәяхәт балаларга бик күп шатлыклы һәм якты эмоцияләр бүләк итте.