Ютазы районының Урыссу поселогында туташлар һәм ханымнар арасында "Халисә" Бөтенроссия Коръән уку бәйгесе узды
Конкурста катнашучыларга һәм кунакларга сәламләү сүзләре белән Ютазы районы башлыгы урынбасары Закуан Ильясов һәм имам-мөхтәсиб Марат Мәрданшин мөрәҗәгать иттеләр.
Районда Коръән уку бәйгесе икенче тапкыр уза. Аны әнисе Хәлисә хөрмәтенә Ютазы районы имам-мөхтәсибе Марат хәзрәт Мәрданшин район хакимияте ярдәме белән үткәрә.
«Халисә» Бөтенроссия конкурсының жюри рәисе - Әйшә ханым Мәрданшина.
Анда төрле төбәкләрдән, әйтик, Удмуртиядән, Башкортстаннан һәм Татарстан районнарыннан килгән 24 Коръән укучы катнашты.
Ә Татарстан мөфтие Камил хәзрәт Сәмигуллин исеменнән чарада катнашучыларны аның урынбасары Илфар хәзрәт Хәсәнов котлады.
Ул бәйгедә катнашучы гүзәл затларга һәм алар өчен җан атарга килгән якыннарына исламда хатын-кызның роле турында сөйләде.
Конкурс ел саен мөселман хатын-кызларын Ислам турында чын белемгә тарту, хатын-кызлар арасында Изге Коръән белән кызыксынуны арттыру һәм халыкны дин буенча мәгърифәтле итү максатыннан үткәрелә.