Ютазы районы башлыгы суга батучыны коткарган өчен Урыссуда яшәүче Илгиз Ильясовны бүләкләде
Бүген, 18 июнь көнне, район башлыгы Аяз Шәфигуллин суга батучы баланы коткарган өчен Ютазы районы башлыгы рәхмәт хаты белән Илгиз Ильясовны батырлыгы, кыюлыгы һәм тәвәкәллеге өчен бүләкләде.
- Сезнең гамәлегез батырлык, фидакарьлек һәм кешелеклелек үрнәге булып тора, - диде Аяз Әдипович. - Сез тиз арада карар кабул итә алгансыз, югалып калмагансыз һәм баланың гомерен саклап кала алгансыз, үзегез үк беренче ярдәмне дә күрсәткәнсез. Гражданнарыбызның авыр вазгыятьтә бер-берләренә ярдәм итүләре горурлык хисләре уята. Бу чын каһарманнар эше, рәхмәт сезгә!
Эш болай була: Илгиз Ильясов Әбсәләм күленә килгәндә, 5-6 яшьлек кызны эзлиләр, таба алмыйлар. Аның боҗрасы йөзә, ә кыз беркайда да күренми. Озак уйлап тормастан, Илгиз Зиннур улы суга сикерә һәм ярдан 7 метрлап ераклыкта баланы судан һушын югалткан килеш алып чыга.
- Батучыларны коткару күнекмәләрем юк иде, баланы эзләп таптым да, алып чыктым. Ярый әле су чиста иде һәм мин инде тирәндә яткан кызны күрә алдым, - ди Илгиз Ильясов. – Мин бернинди батырлык та кылмадым, һәркем минем урында шулай эшләр иде, - дип шәрехли тыйнак каһарманыбыз.
https://vk.cc/c33KVa (Ютазы хәбәрләре)