Мәк үстерсәң, җавап тотачаксың

Татарстанда “Мәк-2013” гомумроссия зур масштаблы оператив-кисәтү операциясе уза.

Узган елның ведомствоара операция барышында Татарстанда 1118 703 квадрат метр мәйданда кыргый наркотик матдә тотучы үсемлекләрнең 411 чыганагы ачыкланды. Республика хокук саклау органнары наркотиклар белән бәйле 1426 җинаятьне теркәделәр, шуларның 715 сату, 666 – саклау, 36 – притоннар оештыру һәм тоту һәм бер очрак наркотиклар контробандасы белән бәйле. Тыелган үсемлекләрне үстерүнең 10 фактына киртә куелды, законсыз әйләнештән 215 килограммга якын наркотик матдә, шул исәптән 156 килограмм марихуана, 32 килограммнан артык гашиш, 16 килограмм мәк саламы алынды.

Бакчачыларга үз җирләрендә нәрсә үстерүләренә җитди игътибар бирү сорала. Гадәттә елның шушы чорында наркоманнар бакча участокларына наркотиклы үсемлекләр эзләп үтеп керәләр, юллары уңган очракта, алардан наркотик матдәләр ясыйлар. Әгәр мәк һәм киндер үсүен искәрәсез икән, аларны кичекмәстән бетерергә яисә хокук саклау органнарына хәбәр итәргә кирәк. 10 данә мәк һәм 20 данәдән артык киндер үстергән өчен 300 меңнән алып штраф салу яисә ике елга кадәр иректән мәхрүм итү карала. Әгәр сезнең участокта моңардан да азрак наркотиклы үсемлекләр үсә икән, сез барыбер җаваплылыктан котылып кала алмаячаксыз. Составында наркотик матдә булган үсемлекләр үстергән өчен гражданнарга 1,5 меңнән алып 4 мең сумга кадәр штраф яисә 15 тәүлеккә кадәр административ кулга алу карала, ә юридик шәхесләргә салына торган штраф күләме 300 мең сумга кадәр җитә. Кыргый наркотиклы үсемлекләрне юк итү буенча чара күрмәгән җир хуҗаларына һәм җирдән файдаланучы гражданнарга унбиштән алып егермегә кадәр, вазифаи затларга – егермедән алып кырыкка кадәр, юридик шәхесләргә өч йөздән алып дүрт йөзгә кадәр минималь хезмәткә түләү суммасында штраф билгеләнә.

Әгәр сезгә наркотик матдәләрне законсыз үстерү, сату яисә саклау турында нәрсә дә булса билгеле икән, бу хакта Бөгелмә шәһәрендәге наркоконтрольнең 8 (85594) 4-22-50 “ышаныч телефоны” буенча хәбәр итегез. Конфиденциальлелек гарантияләнә.