Үзенең данлы юбилеен ул яңа, якты йортта каршы ала
Иске Урыссу авылында яшәүче Гөлниса Миңнегулова үзенең 90 яшьлек юбилее уңаеннан котлаулар кабул итте.
Юбилярны тәбрикләргә район җитәкчелеге вәкилләре – район башлыгы урынбасары Закуан Ильясов, район ветераннар советы рәисе Владимир Петров, шулай ук Урыссу авыл җирлеге башлыгы Фәния Әминова һәм, әлбәттә инде, хезмәт ветеранының туганнары һәм якыннары килгән иде. Гөлниса Мөхсин кызына бик күп җылы теләкләр юлланды һәм ул юбилее уңаеннан бүләкләр кабул итте. Аны чәчәк бәйләмнәре белән күмделәр. Иске Урыссу авылында туып-үскән өлкән яшьтәге юбилярны чын мәгънәсендә фидакарь зат дияргә була. Яшь чагыннан колхозда эшләгән. Дүрт сыйныфны тәмамлагач ук хуҗалык эшендә бил бөккән. Яшь кенә кыз чалгы белән печән чапкан, ат җигеп эшләр башкарган. Фермада һәм басуда эшләү аның төп хезмәт биографиясенә әверелгән. Кулдан авыр хезмәт башкаруына карамастан, Гөлниса апа терлекләрне яраткан.
- Бүгенге көндә мин дөнья белән тулы гармониядә яшим, балалар һәм оныклар уңышларына сөенәм. Алар хезмәтсез генә җитеш тормыш була алмавын күреп үсте. Картлык көнемдә зур хөрмәттә яшәтүләре өчен мең рәхмәт аларга, - дип ассызыклады юбиляр.