Мошенниклар QR-кодлар ярдәмендә кешеләрне «Госуслуги» аша алдауның яңа схемасын төзегән
Бу хакта Россия Федерациясе Цифрлы үсеш, элемтә һәм массакүләм коммуникацияләр министрлыгының матбугат хезмәте хәбәр итә. Ведомство мәгълүматлары буенча, схема онлайн-банкка керү мөмкинлегенә охшаш. «Мошенниклар Дәүләт хезмәтләре”ндәге хисап язмасына, аккаунтны урлау өчен, парольне торгызырга омтыла. Шәхси кабинетка кергәндә алар кулланучының телефон номерын кертә, аңа шалтырата һәм SMS-хәбәрдә алынган кодны әйтүен сорый», - дип билгеләп үттеләр министрлыкта.
Аннары җинаятьчеләр яңа пароль кертә, ә чын аккаунт хуҗасы аңа керү мөмкинлеген югалта. Шул ук вакытта QR-код үз актуальлеге аркасында гына шалтырату өчен тәкъдим буларак кулланыла. Вакцинация яисә кичерелгән авыру турында QR-код расланган хисап язмасында автомат рәвештә барлыкка килә һәм аны бәйләргә кирәкми, дип искәрттеләр Цифрлы үсеш министрлыгында.
Дәүләт хезмәтләре порталындагы аккаунтка керү мөмкинлеге алгач, җинаятьчеләр күп кенә проблемалар тудырырга мөмкин - шәхси мәгълүматларны сатудан алып алданучы исеменә кредит алуга һәм милек белән төрле алыш-бирешләр үткәрүгә кадәр.