Ютазы районында гражданнар җыеннары дәвам итә
19 гыйнвар көнне Әбсәләм авыл җирлегендә үтте. Очрашуда район башлыгы урынбасары Закуан Ильясов, прокурор Тимур Фатыйхов, РБК җитәкчесенең инфраструктура үсеше буенча урынбасары вазифаларын башкаручы Оксана Власова, Урыссу төзекләндерү һәм яшелләндерү предприятиесе директоры Илшат Камалдинов һәм район хезмәтләренең башка җитәкчеләре катнашты. 2021 елда башкарылган эшләр турында авыл җирлеге башлыгы Гөлназ Кубашева сөйләде.
Җирлектә 813 кеше даими яши, 2021 елда 11 бала туган, 17 кеше үлгән. 2021 елда биредә 2020 елга караганда 6 кешегә күбрәк туган. Пенсионерлар -174, унҗиде яшькә кадәрге балалар-162, эшкә сәләтле халык – 477 кеше.
2021 елда шәхси ярдәмче хуҗалыкта савым сыерлары, кәҗәләре, бер яшьтән зуррак кәҗәләре булган гражданнарга 64 700 мең сум күләмендә субсидия бирү рәвешендә ярдәм күрсәтелгән.
2020 ел белән чагыштырганда, балалар бакчасында балалар саны 1 балага кимегән, ә мәктәп укучылары 8 балага арткан. Быел Әбсәләм гомуми белем бирү мәктәбе "Биология һәм информатика сыйныфларын ремонтлау һәм җиһазлау" программасы буенча «Татнефть» ГАҖ грантлары конкурсында 2 млн.250 мең сум күләмендә җиңүчеләр исемлегенә кертелде.
Юллар торышы, урамнарны яктырту, су белән тәэмин итү системасы, янгын куркынычсызлыгы, авылны төзекләндерү - болар эшнең мөһим юнәлешләреннән берсе. 2021 елда республика программасы буенча 8 КФЙ ишегалды төзекләндерелгән, үзара салым акчасына Тынычлык, Әпсәләм тимер юл разъезды урамнарына вак таш җәелгән, Әбсәләмдә Совет урамы асфальтланган.
Үз керемнәре буенча План 111,1 процентка үтәлгән, үзара салым акчасы 246 мең сум күләмендә җыелган.
Җирлектә барлыгы 260 шәхси ишегалды һәм 8 күп фатирлы йорт исәпләнә. Сыерлар һәм мөгезле эре терлек 2020 ел белән чагыштырганда күбрәк – чагыштырма дәрәҗәдә 75 һәм 98, шул исәптән сыерлар - 20 һәм 37. Әмма кошлар һәм сарыклар саны кимегән.
Җирлек башлыгы Гөлназ Кубашева «Пакер» НПФга, аерым алганда, аның җитәкчесе Марат Ногумановка ел дәвамында ярдәм иткәннәре, шулай ук Өлкәннәр көненә, Корбан бәйрәменә азык-төлек пакетлары, 42 данә күләмендә «Ютазы таңы» район газетасына ялгыз яшәүче пенсионерларга язылу оештырганнары өчен рәхмәт белдерде.
- Тагын, әле күптән түгел генә "Пакер" ФПФ Әбсәләм мәдәният йортына экран һәм проектор бүләк итте, - дип шатлыгы белән уртаклашты җирлек башлыгы.
Шулай ук ул авыл тормышында актив катнашканнары өчен «УПНМ» ҖЧҖ директоры Радик Солтановка, КФХ җитәкчесе Вәлиевка, ШЭ Сәлимҗановка, ШЭ Бакировка, "Конкрит" ҖЧҖ директоры Г.Саргсянга һәм башкаларга рәхмәт белдерде. Өмәләрдә, «Чиста ярлар», «Урман утырту көне» акцияләрендә, зиратта тәртип урнаштыруда катнашкан өчен авыл халкына да рәхмәт белдерделәр.
2022 елга бурычлар билгеләнде: үзара салым акчаларын тулысынча файдалану, шәхси ярдәмче хуҗалыкларда терлекләрнең баш санын саклап калу һәм арттыру, авылны төзекләндерүне, яшелләндерүне һәм чистартуны дәвам итү һәм башкалар. "Хакимият һәм халык бердәм эшләсә, без барысын да башкарып чыга алырбыз", - дип ассызыклады авыл җирлеге башлыгы. Җыенда зиратны караучы Рамил Гыйздәтуллин триммер белән бүләкләнде.
Авыл халкы хакимият вәкилләренә үзләрен кызыксындырган сорауларны бирә алдылар, бу - Комсомол һәм Совет урамнарындагы күп фатирлы йортларның фасадларын җылыту, Комсомол урамының асфальт япмасын зур йөк машиналарыннан саклау, Мәктәп урамының канализация системасын үз вакытында чистарту кебек сораулар. Шунысы куанычлы, халыктан сораулар гына яңгырап калмады, шулай ук район һәм җирлек хакимиятенә изге теләкләр һәм рәхмәт сүзләре дә җиткерелде.
- Безнең Әбсәләмдә бик матур һәм уңайлы, - ди авылда яшәүче Нәзилә Зарипова, - бөтен җирдә ут яна, ишегалларын күркәм итеп ясадылар, газ бар, юллар бар. Авыл яши һәм чәчәк ата. Җитәкчелеккә зур рәхмәт, сәламәтлек һәм уңышлар сезгә!
Барлык теләкләр һәм тәкъдимнәр алдагы эш өчен беркетмәгә кертелде.