Үзара салым түләдеңме?
Ел саен Татарстан хөкүмәте муниципалитетларга финанслашуда ярдәм күрсәтә, яшәүчеләр уңай мохиттә яшәү теләкләрен акчалата раслыйлар.
Үзара салым программасы кысаларында район җирлекләрендә үткәрелгән ремонт, төзелеш һәм төзекләндерү эшләренә тукталып сөйләп тормыйм. Нәтиҗәләр һәр торак пунктта күз алдында. Гадәттәгечә, авыл җирлекләре үзара салым җыюга җитди якын киләләр. Шулай итеп, Ташкичү һәм Акбаш авыл җирлекләренең үзара салымны 100 процентта җыю буенча оператив эшен ассызыклап үтәргә кирәк. Калган авыллар да эшне тиз тоту юнәлешендә. Ничек кенә булмасын, дип ассызыклады район башлыгы Аяз Шәфигуллин оператив киңәшмә барышында, бу атнада эшне активлаштырырга гына түгел, ә аны төгәлләргә кирәк. Атна ахырына республикага акча күчерелергә тиеш. Исегезгә төшерәбез, авылларда элеккеге ярдәм алгоритмы эшли – республика җыючыларның һәр сумына дүрт сум бүлеп бирә. Урыссу бистәсендә бу схема бераз аерыла – бергә - өч сум бирелә.
21 мартка Урыссу поселогында миллион сум да акча җыелмаган. Чагыштыру өчен, узган елда бу чорга 1 млн 300 мең сум җыелган булган. Димәк, республика акчалары да берничә тапкыр азаеп кайтачак, дигән сүз. Ә соңгы вакыйгалар яктылыгында һәр тиен исәптә. Авыл җирлекләрендә 3 миллион сумнан артык акча җыелган. Авылларда һәм Урыссу бистәсендә исә халык саны якынча тигез.
Әлбәттә, почтальоннарның начар эшләве дә акча җыелуга тискәре йогынты ясагандыр. Әйтик, Урыссу бистәсенең шәхси секторында яшәүчеләрнең күбесе үзара салым түләү турында квитанцияләр алмаганнар. Чөнки аларны таратмаганнар.
Ничек кенә булмасын, аномаль озакка сузылган корылык яки коронавирус рәвешендә тормыш китергән катаклизмнарга сылтанырга кирәкми. Кеше йокыда авыр чорларны кичереп, иң яхшы дөньяда уянып китә алмый. Яшәргә һәм иҗат итәргә кирәк. Без үз үсешебездә артка чигенгән ниндидер кире хәрәкәт – регрессия булдыра алмыйбыз.