Урыссу поселогы яшьләре - ял турында
Урыссу поселогының «Энергия» стадионында Яшьләр советының яшьләр эшләре, спорт һәм туризм бүлеге оештырган чираттагы утырышы булды.
Исегезгә төшерәбез, узган очрашуда яшьләр бүлеге начальнигы Регина Галләмова яшь буынга районда ни җитми, дигән сорау белән мөрәҗәгать итте. Ютазы районының актив яшьләре бу юлы яңа кызыклы тәкъдимнәр белән җыелды. Очрашуда шулай ук район башкарма комитеты җитәкчесенең социаль мәсьәләләр буенча урынбасары Сергей Рузанов та катнашты.
Хәзерге студентлар бистәдә дискотекалар турында хыяллана, әлеге мәсьәлә хакында фикер алышканнан соң, сулыклар янында яки «Яңарыш» паркында гадәти булмаган дискотекалар үткәрергә тәкъдим ителде.
Бер яшь кеше «Автозвук» фестиваль-конкурсын үткәрүнең креатив идеясе белән уртаклашты. Бу автомобильчеләрнең үзенә күрә бер ярышы, аның максаты - катнашучыларга машиналарда тавыш системаларының ни дәрәҗәдә көчле булуын күрсәтү мөмкинлеге бирү. Мондый фестивальләр инде берничә ел зур шәһәрләрдә үткәрелә.
Моннан тыш, җәйге чорда уртак турпоходлар уздыру, балык тотарга бару тәкъдим ителде. Ютазы районындагы КВНга нигез салучы Влад Яшин элеккеге агач эшкәртү комбинаты территориясендә пейнтбол буенча команда уеннары үткәрү мөмкинлеге турында сөйләде.
Сергей Рузанов эшче яшьләр һәм студентлар арасында футбол лигасы булдыру идеясен яңгыратты, ә егетләрнең барлык мөһим тәкъдимнәрен игътибарга алды.
Регина Галләмова киләсе очрашуга районда июнь аенда булачак Россия яшьләре көнен үткәрү идеясен әзерләү тәкъдиме белән мөрәҗәгать итте.