Һөнәри бәйрәмдә - спорт залында
Җирле үзидарә хезмәткәрләре көнен әлеге эшчәнлек өлкәсе хезмәткәрләре актив ял белән билгеләп үтәргә булганнар.
Урыссу поселогының «Олимп» спорт комплексында авыл җирлекләре башлыклары, Башкарма комитет һәм район Советы хезмәткәрләре җыелды. Аларга хәрәкәтчән уеннарда һәм күңелле спорт ярышларында катнашырга тәкъдим ителде. Яшьләр эшләре, спорт һәм туризм бүлеге оештырган чара башланыр алдыннан район Советы Аппараты җитәкчесе Наталья Майорова хезмәттәшләрен бәйрәм белән котлады, аларга кешеләргә хезмәт итүдә, гомумән район иминлеге хакына башкарылган авыр хезмәтләрендә уңышлар теләде. Яшьләр эшләре, спорт һәм туризм бүлеге начальнигы Регина Галләмова «Уен кагыйдәләре» турында сөйләде һәм катнашучыларга старт бирде. Муниципаль хезмәт хезмәткәрләре эстафетаны зур дәрт һәм энтузиазм белән башлап җибәрделәр! Җанатарларның туктамас “давай, давай!” дигән хуплау тавышлары астында өч команда йөгерде, сикерде, чапты, кемнең иң тиз, иң җитез һәм оста булуын ачыклау кыен булды. Катнашучылар, бөтен дөнья турында онытып, бер сәгатьтә яшьлек дәртенә һәм оптимизмга ия булдылар. Сүз уңаеннан, командаларның исеме аларның “җисемнәренә” туры килде – “Актив”, “Оптимистлар” һәм “Удача.татар.ру”.
Әлбәттә, барысы да үзләренең сугышчан сыйфатларын, спорт сөючәнлекләрен һәм яхшы физик формаларын тулысынча күрсәттеләр. Әмма ярыш – ярыш инде. Аның нәтиҗәләре буенча беренче урынны «Актив» командасы яулады, икенче – «Удача.татар.ру "һәм өченче - "Оптимистлар".