“Ютазы йолдызлары” дусларын җыйды
Ютазы авылы мәдәният йорты сәхнәсендә “Ютазы йолдызлары” халык бию ансамбленең отчет концерты узды.
Гади генә бер кыз бала үз эшенең остасы – ансамбльнең алыштыргысыз җитәкчесе Минзилә Абдурахманова тәрбиясе нәтиҗәсендә талант иясенә әверелә. Моның шулай икәнлегенә чираттагы концертта инанырга туры килде. Менә Рамил Абдурахмановның татар җырларын бик моңлы башкаруы. Әйе-әйе, һәрвакыттагыча, Абдурахмановлар сәхнәдә - Рамил, Минзилә, Рөстәм, Тимур, Айгөл... Тиздән, Ходай кушса, оныклары да чыгар әле. Шулай итеп, җыр яңгырый һәм кинәт сәхнәгә җиңел атлап һәм яшел төстәге милли костюмнар кигән кызлар чыга. Аларның аяклары идәнгә дә тими сыман! Алар җитди вокалчы янында бөтерелеп йөри. Күңел нечкәреп кенә калмый, мондый югары классны күргәч, биючеләр өчен чын горурлык хисе биләп ала. Бу концерт - отчет концерты. Монда - иң яхшы номерлар, иң яхшы башкару. Әмма бу коллективка барлык сәхнәләр дә буйсына. Безнең район сәхнәләре генә түгел. Мәскәүдә җиңү яулап кайтканнан соң, алар Франциягә барырга тиеш иде - коллективка Парижның иң яхшы концерт мәйданчыклары алкышласын өчен. Кызганычка каршы, соңгы вакыйгалар яктылыгында сәфәр тормышка ашмастыр. Ютазы төбәгенә килгәндә исә, танылган һәм без яратып өлгергән «Ютазы йолдызлары» ансамбле кызларыннан башка Сабантуй булсынмы, Җиңү бәйрәмеме, районда бер генә масштаблы чара да узмый.