Ютазы районында лаеклы гаиләләр яши
Район мәдәният йортында Халыкара гаилә көненә багышланган бәйрәм чарасы узды.
Залда бөтен районнан төрле буын гаиләләре җыелды. "Ютазы Йолдызлары" бию ансамбле башкаруында матур бию номерыннан соң ,50 елдан артык тату гомер иткән гаилә парларын хөрмәтләү тантанасы башланды. Район башкарма комитеты җитәкчесенең социаль мәсьәләләр буенча урынбасары Сергей Рузанов барысын да бәйрәм белән котлады һәм бүләкләү тантанасын җитәкләде. Дулкынландыргыч һәм сөйкемле, хөрмәтле өлкән яшьтәге парлар зал алкышларына күмелеп, лаеклы котлаулар һәм истәлекле бүләкләр алдылар. Аларны тәбрикләргә яраткан балалары һәм оныклары да килгән иде.
Шулай ук "Нык гаилә" район проектын тормышка ашыруга йомгак ясалды. Мәгариф бүлеге җитәкчесе Абрамов С.А. иң актив, иҗади һәм спорт гаиләләренә Рәхмәт хатлары тапшырды. Уку елы дәвамында ата-аналар балалар белән бергә район, республика һәм бөтенроссия конкурсларында катнаштылар.
Ата-аналар комитетлары "Тату сыйныф серләре" конкурсында җиңүчеләрне һәм призерларны котладылар.
Моннан тыш, Халыкара гаилә көненә багышланган район чарасында "Тату сыйныф серләре" район конкурсының Ата-аналар комитеты командаларын бүләкләделәр.
Район мәдәният йорты артистлары тамашачыларны матур чыгышлары белән сөендерделәр, тамашачыларга яхшы кәеф бүләк иттеләр.