"Талантлар йолдызлыгы-2022» - шундый исем астында Урыссу гимназиясе базасында сәләтле балалар слеты узды
Гимназиянең актлар залында педагоглар һәм аларның тәрбияләнүчеләре җыелды. Аларга дипломнар, чәчәкләр, медальләр һәм залның көчле алкышларын кабул итү өчен сәхнәгә менәргә кирәк булды. Тантана сәбәпчеләре белән аларның уңышларын һәм шатлыкларын уртаклашырга район башлыгы Аяз Шәфигуллин, район башкарма комитеты җитәкчесенең социаль мәсьәләләр буенча урынбасары Сергей Рузанов, мәгариф бүлеге начальнигы Сергей Абрамов, Урыссу гимназиясе директоры Гөлдания Белалова һәм башкалар килгән иде. Бу малайларны һәм кызларны йолдыз дип атадылар, чөнки алар укуда зур уңышларга ирештеләр, һәрвакыт актив, төрле башлангычларда һәм чараларда мобиль булдылар. Ә моңа тырыш хезмәт, түземлек һәм җиңүгә омтылыштан башка ирешеп булмый.
Район башлыгы үзенең сәламләү сүзендә билгеләп үткәнчә, район мәгариф учреждениеләре укучылары арасында олимпиада хәрәкәтендә катнашучылар саны елдан-ел арта бара.
- Мондый темплар белән, - дип билгеләп үтте район башлыгы, - безгә сәхнә дә кысан булачак. Бу уңышларга ирешергә булышкан остазларыгызга һәм әти – әниләрегезгә - аерым рәхмәт сүзләре. Иң мөһиме - хәзер алган белемнәрне тормышта куллана алу.
Район башлыгы Бөтенроссия мәктәп укучылары олимпиадасының региональ этабы һәм мәктәп укучылары олимпиадасының республика этабы җиңүчеләре һәм призерларына грант тапшыру тантанасын җитәкләде. Менә сәхнәгә Бөтенроссия мәктәп укучылары олимпиадаларының муниципаль этабында җиңүчеләрнең данлы төркеме күтәрелде. Алар - Урыссу гимназиясе, Урыссудагы 1, 2 һәм 3 санлы мәктәпләр, Бәйрәкә, Ютазы, Каразирек, Иске Урыссу, Димтамак, Әбсәләм, Кече Урыссу, Кәрәкәшле һәм Акбаш мәктәпләре укучылары. Алар залның лаеклы алкышларына күмелде.
Безнең районның йолдызлы күгендә энергияле һәм спортчы затлар буыны аерым урын алып тора. Бу бит рекордлар гына түгел, барыннан да элек бу – сәламәтлеккә старт мәйданчыгы. Безнең район, чыннан да, спортның күп төрләре буенча “спорт районы”. Спорт белән бездә мәктәп эскәмиясеннән дуслар. Бу хакта сүз район башкарма комитеты җитәкчесенең социаль мәсьәләләр буенча урынбасары Сергей Рузанов чыгышында барды. ТР Мәгариф һәм фән министрлыгы дипломнары, кубоклары, район башкарма комитетының Рәхмәт хатлары... Төрле спорт ярышларында югары спорт күрсәткечләре өчен фанфаралар авазы. Юк, бу талантлар йолдызлыгы гына түгел, бу “йолдызлар яңгыры”!
Бүләкләү район мәдәният йорты артистлары чыгышы белән үрелеп барды. Чара барысының бергә «Интеллект» гимнын башкаруы белән тәмамланды.