Иген кырларыннан юллар Ютазы элеваторына алып бара
Көн саен Ютазы элеваторы 2 мең тоннага якын ашлык кабул итә.
Бу хакта предприятие директоры Тәлгать Исаков хәбәр итте. Элеватор бер генә минутка да буш тормый. Бер-бер артлы ашлык төялгән машиналар килә. Пробоотборник янында әле генә килгән машина тора иде.
- Нигездә, ашлык клейковинасы 4-5 класска туры килә, - ди лаборатория мөдире Ольга Садыйкова. – Сирәгрәк - 3 нче класска. Безнең районнан арпа һәм арыш алып киләләр.
Исаков билгеләп үткәнчә, яңа уңышны кабул итүгә Ютазы элеваторы яңа җиһазлар белән әзерләнгән. Әйтик, лабораториягә 3,5 млн сумлык җиһаз сатып алынган. Киштәләргә махсус тартмаларда хуҗалыклардан тәүлеклеклек уртача үрнәкләр куелган иде - дымлылык, клейковина, чүплелек дәрәҗәсен билгеләү өчен. Элеватор лабораториясендә безнең район ашлыгының сыйфаты яхшы, дип билгеләп үттеләр.
Элеватор җитәкчесе белән без территория буйлап йөрдек, цехларда булдык.
- Урып-җыю башланганнан алып бүгенге көнгә кадәр безнең предприятие 18 мең тоннадан артык ашлык кабул итте, - дип билгеләп үтте Тәлгать Исаков. – Безгә дүрт районнан - Бөгелмә, Баулы, Азнакай һәм Ютазы районнарыннан ашлык алып киләләр. Кагыйдә буларак, ашлык коры, аның 15 процентка якыны киптерелә. Билгеле, июнь аенда без тулы тикшерү уздык, анда тиешле контроль хезмәтләре биналарның һәм цехларның ашлык кабул итүгә әзерлеген тикшерделәр. Элеваторның сыйдырышлыгы - 64 мең тонна. Әмма безнең күләмнәр күбрәк, чөнки кабул итү барышында без параллель рәвештә төяп тә җибәрәбез. Күргәнегезчә, безнең тимерьюл, үз вагоннарыбыз бар. Икмәкләребез Пермьгә дә, Глазовка да китә... Билгеле булганча, узган елда корылыкка бәйле рәвештә икмәкнең уңышы яхшы булмады. Шулай итеп, бездә эш күләме кимеде, штатлар кыскартуга барырга туры килде. Быелгы ел хәлне төзәтергә мөмкинлек бирде. Бүгенге көндә штат режимында 65 кеше эшли. Өстәвенә, килешү нигезендә без вакытлы эшчеләр дә яллыйбыз. Кабул итү октябрь аена кадәр дәвам итәчәк.
Игътибар! Район авыл хуҗалыгы һәм азык-төлек идарәсеннән алынган мәгълүматларга караганда, район буенча бөртеклеләрнең 30 проценттан артыгы суктырылган. Икмәк уңышларының уртача уңышы - гектардан 32,6 центнер (ТР буенча - 31 центнер). Иң зур уңыш «Г.Четвертакова» крестьян-фермер хуҗалыгында: биредә бер гектар 42 центнер уңыш бирә. «А.Вафауллин» крестьян - фермер хуҗалыгында уңышлылык - 41 центнер, «АгроМир» ҖЧҖдә - 39 центнер.