Фельдшер булырга хыялланган

2022 елның 23 августы, сишәмбе

Туксан дүрт яшьлек Миңсылу Гарифуллина, үткән юлын хәтереннән кичереп, кеше дөньяга авырлыкларны  туктаусыз  җиңү өчен туа икән, дигән фикергә килә.

Безнең героебыз - Бәйрәкә авылында туып-үскән, әмма аның бөтен гомере Ташкичү белән бәйле.

- Без монда өч бала белән 1955 елның февралендә күчеп килдек, - дип искә ала Миңсылу апа. – Ирем  Галиәскәр Гарифуллинны райком Микоян исемендәге колхозга рәис итеп җибәрде. Тузган өйгә күчтек, өй базында  бәрәңге өшеде. Бу 1957нче ел иде.