Районның мәктәп ишегаллары укучыларның шатлыклы авазлары белән тулды
Белем көнендә укытучыларны, мәктәптә тәрбияләнүчеләрне һәм аларның ата-аналарын котларга район җитәкчелеге вәкилләре дә килгән иде. Шуны да билгеләп үтәргә кирәк, Урыссудагы 3нче номерлы мәктәп Урыссу интернат-мәктәбе, Димтамак, Иске Каразирек һәм Иске Урыссу мәктәпләре капиталь ремонттан соң ачыла.
Чынлыкта, монда мәктәп җиһазлары да яңартылды. Барысы да мәгариф стандартларына туры килә.
Район башлыгы Аяз Шәфигуллин, линейкага җыелучыларны Белем көне белән котлап, беренче сыйныф укучыларына аеруча игътибар юнәлтте. Аларга бик күп укырга һәм башка уку йортларында укуны дәвам итәргә туры киләчәк. Өлкән сыйныф укучыларына исә, район башлыгы, белем багажын тулыландырып, районга кайтуларын теләде. Укуларын максатчан юнәлештә дәвам итәргә теләүчеләр өчен, район стипендиатлары буларак, февраль аенда ук район башкарма комитетына мөрәҗәгать итәргә кирәк. Барлык тармакларда диярлек - спортта, мәдәнияттә, мәгарифтә... белгечләр кытлыгы бар.
Уку процессына – җитди һәм яңа җиһазларга сакчыл мөнәсәбәттә булу чакыруын да укучылар ишеткәндер дип уйларга кирәк.
1 сентябрьдә тантаналы линейкаларның ил һәм республика гимннары астында Россия һәм Татарстан флагларын күтәрүдән башлануы яңалык булды.