Боҗралы ярышлар: Урыссуда беренче тапкыр

Яшьләр эшләре, спорт һәм туризм бүлеге тарафыннан оештырылган "4*4 боҗралы узышлар" чарасы дамба артында мотодром территориясендә үткәрелде. Автомобильләргә минималь вакыт эчендә катлаулы, ләкин кыска юл үтәргә кирәк иде. Старт судья командасыннан башланды. Тулы приводлы  машиналар үзара тизлектә көч сынаштылар, пычракны, тирән күлләвекләрне һәм трамплиннарны җиңделәр.

Барлыгы Татарстан һәм Башкортстан Республикаларыннан - Урыссудан, Октябрьскийдан, Түбән Камадан, Туймазы һәм Чаллы шәһәрләреннән 17 катнашучы ярышты. Автоузышның баш судьясы итеп Урыссуның «Барс 4х4» внедорожниклар клубы җитәкчесе Айдар Гарифуллин билгеләнде.

Гадәти булмаган ярышларны карарга тамашачылар күп җыелган иде. Урау юл буенда поселокта яшәүчеләр һәм кунаклар басып тора. Район башлыгы Аяз Шәфигуллин һәм башка җитәкчеләр дә чарада катнаштылар.

Чара җанлы һәм эмоциональ узды! Драйв, адреналин, тизлек, искиткеч тамаша - болар барысы да төрле яшь һәм буын кешеләрен берләштерде.

Җиңүчеләргә кубоклар, медальләр һәм дипломнар, шулай ук кыйммәтле бүләкләр тапшырылды. Ярышларда катнашучыларның барысы да дипломнар һәм истәлекле бүләкләр алдылар.

Чара уңышлы үтте - катнашучылар да, тамашачылар да канәгать калдылар!