Урыссу үзәк район хастаханәсенең табиб-эндокринологы Айгөл Михайлова Бөтендөнья шикәр чире белән көрәш көне кысаларында бу мәкерле авыруның таралу сәбәпләре турында сөйләде
Иртәгә яшәү өчен бүген белергә
Бүгенге көндә Урыссу үзәк район хастаханәсенең эндокринолог кабинетында «шикәр диабеты» диагнозы белән 700дән артык кеше исәпкә куелган. Агымдагы елда 6 диабет белән интегүче вафат булган.
Кешене инвалид итәргә яки үлемгә китерергә мөмкин булган җирдәге өч куркыныч авыруның берсе - диабет, һәм аны Ютазы районында ачыклау тенденциясе, кызганычка каршы, кимеми.
- Бу авырудан интегүче кешеләр санының артуының төп сәбәпләренең берсе - артык авырлык. Бүгенге көндә кешеләргә физик активлык җитми. Диабет өлкән яшьтәге кешеләрдә генә була дигән фикер дөрес түгел. Безнең районда әлеге диагноз куелган яшь һәм урта буын кешеләре шактый, - дип белдерде Айгөл Ләбиб кызы.
Диабет кеше тормышын куркыныч астына куя торган башка авырулар белән бергә бара: шикәр чире белән авыручы 10 пациентның сигезе йөрәк-кан тамырлары авыруларыннан үлә. Шулай ук аякларны кисү очраклары да сирәк түгел.
Шикәр чирен профилактикалау өчен, беренче чиратта, хәрәкәтчән яшәү рәвеше алып барырга кирәк. Көн саен ким дигәндә 30 минут күнегүләр ясау мөһим. Сәяхәт, баскычка менү, йөзү бик файдалы, ди табиб. Уйлап карасак, безнең һәрберебез шундый актив тормыш алып бара ала. Безнең районда моның өчен барлык шартлар да бар. Теләк һәм ихтыяр көче генә кирәк. Шул ук вакытта Айгөл Михайлова II типтагы шикәр авыруы белән авыручыларга, кандагы глюкоза концентрациясен контрольдә тотып, йөкләнеш режимын аерым сайларга кирәк, дип кисәтә. Әлбәттә, гәүдә авырлыгын киметү, аз калорияле диета тоту киңәш ителә. Менюда шикәр, бал, татлы ризыклар һәм эчемлекләр кебек җиңел үзләштерелә торган углеводлар булырга тиеш түгел. Башка авырулар кебек үк, спиртлы эчемлекләр эчү дә диабет белән авыручыларга уңай тәэсир итмәячәк.