Районда алардан баш тарткан балалар юк
Район мәдәният йортында «Демография» милли проекты кысаларында оештырылган конференция булды.
Конференция барышында җирле хакимиятнең иҗтимагый оешмалар белән багланышлары, гаиләләр, балаларның сәламәт үсеше өчен нинди шартлар тудырылуы турында зур сөйләшү булды, конференция эшендә район җитәкчелеге, барлык иҗтимагый оешмалар вәкилләре, җирлек башлыклары, мәктәпләр, мәдәният йорты директорлары, табиблар һәм фельдшерлар катнашты. Райондагы демографик хәл, гаиләләргә социаль ярдәм күрсәтү турында район башкарма комитеты җитәкчесе Светлана Самонина сөйләде. Аерым алганда, ул 2022 елда районда социаль программаларны тормышка ашыру өчен акча аннан элекке елда бүленгән сумма дәрәҗәсеннән ике тапкыр артып китүен билгеләп үтте. Әйтик, өченче ел рәттән районда яшь белгечләргә йортлар төзелә. Киләсе елда шундый йортны Ташкичүдә төзү планлаштырыла.
- Әгәр элегрәк күпфатирлы йортларны капиталь ремонтлауга 20 миллион сум акча бүленсә, 2023 елга 32 миллион сум рөхсәт ителде, - дип билгеләп үтте Самонина. - Шулай ук өченче ел рәттән районда «Безнең ишегалды» программасы уңышлы тормышка ашырыла. Урыссу бистәсе Урыссу урамындагы 24 һәм 26 номерлы күпфатирлы йортларның йорт яны территориясендәге проект бик кызыклы булды. Хәзер биредә «Татнефть» ГАҖ линиясе буенча грант акчасына төзелгән заманча спорт мәйданчыгы бар. Иске Урыссу авылындагы Хәтер паркы зур проект булып чыкты. Паркның үзенчәлеге булып Бөек Ватан сугышында катнашучыларның гына түгел, тыл хезмәтчәннәренең, локаль сугышларда катнашучыларның исемнәрен мәңгеләштерү тора. Аның төзелешендә 10 млн сум акча файдаланылды. Узып баручы елда мәгариф учреждениеләрен капиталь ремонтлау программасы буенча районның биш мәктәбе ремонтланды, шуларның өчесе – авылларда.
Район башкарма комитеты җитәкчесе муниципалитет тарафыннан башкарыла торган башка программаларга да тукталды. Демографиягә карата, бүгенге көндә районда 20 539 кеше яши. Туучылар саны буенча чагыштырмача динамика күзәтелә. Әгәр 2021 елда 119 бала туган булса, 2022 елның ун аенда – 123. Конференциядә катнашучыларга слайдларда районда аерылышуларны киметү, гаилә парлары аңында балалар алдында да, җәмгыять алдында да зур җаваплылык булдыру өчен нинди чаралар үткәрелүен күрсәттеләр. Конференциядә яңгыраганча, демография -туучылар саны күрсәткече генә түгел, ул халыкның гомер озынлыгы, актив картлык та. Шуңа күрә районда диспансерлаштыру мәсьәләсенә җитди игътибар бирелә. Эш шунда ки, планлы тикшерү процессында җитди авырулар ачыклана, алар аяныч нәтиҗәләргә китерергә мөмкин. Кешеләр үзләре үз сәламәтлекләрен кайгырта башладылар. Әгәр 2021 елда диспансерлаштыруны тиешле кешеләрнең 90 проценты узса, 2022 елның 11 аенда - 103 процент.
Күп балалы гаиләләргә зур игътибар бирелә. Безнең районда 297 күп балалы гаилә бар, аларда 946 бала тәрбияләнә. Муниципалитет ел саен республика Хөкүмәте һәм өч һәм аннан да күбрәк бала тәрбияләүче гаиләләр алдында да йөкләмәләрне үти: мондый 49 гаилә Солнечный микрорайонында йорт төзү өчен җир участоклары алды. Бер тапкыр бирелә торган һәм ташламалы түләүләр мәсьәләсе вакытында хәл ителә. Күп балалы гаиләләрдән тыш, районда опекун гаиләләр дә бар, алар да муниципалитет тарафыннан игътибар таләп итә. Районда алардан баш тарткан балалар булмавын белү күңелле. Киресенчә, бездә һәрвакыт башка районнар һәм төбәкләрдәге ата-анасыз калган балаларны кабул итәргә әзер гаиләләр бар. Бу хакта Светлана Самонина чыгышында сүз барды.