Урыссу үзәк район хастаханәсендә СПИДка каршы акция узды
Ютазы районында 2022 елда ВИЧ-инфекцияле анадан бер бала туган.
Бүгенге көндә мондый диагноз белән ике бала исәптә тора.
Урыссу үзәк район хастаханәсенең йогышлы авырулар бүлмәсе шәфкать туташы Эльмира Ситдыйкова мәгълүматлары буенча, ВИЧ-инфекция белән исәпкә барлыгы 54 кеше куелган. Шуларның 26сы - хатын-кыз. Ел дәвамында Ютазы районы буенча 3457 кеше ВИЧ-инфекциягә тикшерелгән.
1 декабрь - Бөтендөнья СПИДка каршы көрәш көне кысаларында Ютазы районында Әлмәт шәһәренең СПИД һәм йогышлы авыруларны профилактикалау һәм аларга каршы көрәш буенча республика үзәгенең медицина психологы Ландыш Артемьева һәм фельдшер-лаборант Ирина Гудошникова булдылар. Алар Урыссу гимназиясе укучылары, «Электросоединитель» җәмгыяте эшчеләре алдында ВИЧ-инфекция йоктыру очраклары һәм профилактика чаралары турында чыгыш ясадылар.