Ютазы төбәге Татарстанның көньяк-көнчыгыш көрәшчеләрен сәламләде
17 декабрьдә Урыссу поселогының “Олимп” спорт-сәламәтләндерү комплексында 2003-2012 елгы үсмерләр һәм яшүсмерләр арасында көрәш буенча Ютазы районының ачык турниры булып узды.
Безнең район һәрвакыт төрле спорт төрләре буенча югары казанышлары белән дан тотты. Милли көрәшнең данлы традицияләрен торгызу - район җитәкчелегенең өстенлекле бурычы. Шунысын да билгеләп үтәргә кирәк, бездә спортның һәм әлеге төрнең дә, уңышлы үсеше өчен барлык шартлар да тудырылган. Милли көрәшнең иң яхшы вәкилләрен җыйган бүгенге ярышлар моның ачык дәлиле. Бу турыда көрәшчеләр алдында сәламләү сүзендә район башлыгы Аяз Шәфигуллин хәбәр итте. Катнашучыларга уңышлы чыгышлар һәм җиңүләр теләп, ул бүләкләү тантанасын җитәкләде.
Районда югары спорт күрсәткечләре һәм милли көрәшне үстергән өчен көрәш буенча тренерлар Радик Әхмәтҗанов, Тимур Борһанов һәм Рамил Касыймов бүләкләнделәр. Ярышлар башланыр алдыннан район мәдәният йорты артистлары, һичшиксез, көрәшчеләргә яхшы энергия өстәп, бәйрәм атмосферасы тудырдылар.
Менә алар, физик яктан камил һәм ыктымат спортчылар, спорт маршы астында үзләренең бөтен осталыкларын һәм физик әзерлекләрен күрсәтү өчен залдан чыга. Әйе, ярышларның баш судьясы Радик Әхмәтҗанов җитәкчелегендәге судьялар коллегиясенә иң яхшыларны билгеләү җиңел эш булмаячак. Ләкин ярыш – ярыш инде. Җиңүчеләр һәм призерлар, һичшиксез, булачак, бу турыда – бераз соңрак.