Ютазы районында «Мәгариф» милли проектының «Россия Федерациясе гражданнарын патриотик тәрбияләү» федераль проектын гамәлгә ашыру дәвам итә.
Февральнең кызыклы һәм истә калырлык чараларының берсе - Яшьармия йорты, Балалар иҗат үзәге, мәгариф бүлеге һәм район активистлары белән берлектә оештырылган Яшьармия балы булды.
"Яшь армиячеләр - үз эшләре, илебезне берләштерү һәм аның данын арттыруга юнәлдерелгән дөньяга карашлары белән үзләренең актив тормыш позицияләрен раслаучы укучылар», - диде үзенең сәламләвендә Башкарма комитет җитәкчесенең социаль мәсьәләләр буенча урынбасары Рузанов С. А.
Хәрби формадагы яшүсмерләр, "ЮНАРМИЯ" логотибы төшерелгән футболкаларда, матур костюмнарда һәм кызлар - бал күлмәкләрендә тамашачыларга чын бию сәнгате бәйрәмен бүләк итте.
"Барлык катнашучылар да бик тәэсирләнде. Этикетның, горурлыкның һәм ихтирамның нәрсә икәнен ишетеп кенә белмәгән балаларыбыз өчен бу чара чын бәйрәмгә әверелде һәм эстетика һәм грациянең матур дөньясына кагылырга мөмкинлек бирде. Россиянең күп кенә төбәкләрендә яшьармиячеләр арасында баллар традициягә әйләнде инде. Бу безнең районда да күркәм традициягә әверелер дип ышанасы килә. Беренче чиратта мондый чаралар намус, гаделлек һәм зыялылык кебек төшенчәләрне популярлаштыру өчен уздырыла», - дип билгеләп үтте мәгариф бүлеге җитәкчесе урынбасары А. Ф. Мөхәммәтҗанова.
Мондый чаралар социаль актив эшчәнлеккә җәлеп ителгән укучыларның санын арттыруга ярдәм итә, шулай ук патриотик проектларны колачлау арта.