Урыссуда «Атлант» яшьләр үзәген ачу тантанасы узды
Урыссуда «Атлант» яшүсмерләр-яшьләр клубы ачылу көннең бик мөһим һәм әһәмиятле вакыйгасы булды.
Клубны оештыру идеясе берничә ел элек яшьләр эшләре, спорт һәм туризм бүлегендә барлыкка килгән. Һәм менә ул, ниһаять, тормышка ашты! «ТР клубларын һәм яшьләр үзәкләрен капиталь ремонтлау» программасы буенча элеккеге музыка мәктәбенең иске бинасы тулысынча ремонтланды һәм яшьләр үзәге итеп җиһазландырылды.
Яшьләр үзәген ачу тантанасын ТР Яшьләр эшләре министрының беренче урынбасары Ринат Садыйков, Ютазы районы башлыгы Аяз Шәфигуллин һәм Башкарма комитет җитәкчесе Светлана Самонина алып барды. Тасманы кисеп, алар яшүсмерләр клубының уңайлы бүлмәсенә керделәр.
Туймазы шәһәренең «Non-Stop» бию коллективы кунакларны дәртле бию белән каршы алды, җирле яшьләргә мастер-класс күрсәтте. Хөрмәтле кунаклар һәм район җитәкчелеге вәкилләре үзәкнең укыту дәресләрен үткәрү өчен кабинетлар белән таныштылар. Яшүсмерләр өчен биредә төрле заманча юнәлешләр - кибер спорт, тавыш яздыру студиясе, медиа үзәк, тикток клуб буенча дәресләр үткәрү планлаштырыла. Исегезгә төшерәбез, «Атлант» яшүсмерләр-яшьләр клубы эш көннәрендә 8 сәгатьтән 17 сәгатькә кадәр эшләячәк. Үзәк югары сыйныф укучыларына юнәлдерелгән.
Яшүсмерләр-яшьләр клубы бинасы һәм юнәлешләре белән танышып, җитәкчелек вәкилләре районда мондый урынның заманча яшьләргә кирәклеген билгеләп үттеләр. Шуннан соң алар «Дубравушка» балаларны сәламәтләндерү лагерена андагы капиталь ремонт барышын бәяләргә киттеләр.
Ә үзәктә күңел ачулар дәвам итте, Туймазыдан креатив алып баручылар Илнур һәм Рәмис җыелган балалар өчен үзәкнең җәйге террасасында уен программасы үткәрделәр.