Урыссу поселогы Советының депутатлар корпусы тулыланды
Район башкарма комитеты утырышлар залында IV чакырылыш Урыссу шәһәр тибындагы поселогы Советының чираттан тыш утырышы узды.
Утырыш эше Урыссу шәһәр тибындагы поселогы башлыгы Аяз Шәфигуллин рәислегендә үтте.
Депутатлар каравына биш мәсьәлә тәкъдим ителде, алар белән 2 нче Май сайлау округы депутаты Равил Гарипов һәм район Советының юридик бүлеге начальнигы Руслан Якупов таныштырды. Аерым алганда, Равил Гарипов 9 нчы Тукай сайлау округы депутаты Федор Мироновны бюджет-финанс комиссиясе составына кертү һәм тиешле карар кабул итү тәкъдиме белән чыкты. Депутатлар корпусы бертавыштан әлеге карарны кабул итү өчен тавыш бирде. Аяз Шәфигуллин Мироновны яңа вазифасы белән котлап, аңа депутат мандаты тапшырды.
Башка мәсьәләләр элек расланган Урыссу поселогы Советы карарлары нигезләмәләренә теге яки бу үзгәрешләр кертү белән бәйле булды. Әйтик, сүз гражданнар мөрәҗәгатьләрен карау тәртибе һәм вакыты; Урыссу поселогында бюджет процессы турында; муниципаль хезмәт турында; Урыссу поселогы территориясендә төзекләндерү өлкәсендә муниципаль контроль турында барды. Депутатлар карар проектларын караганнан соң, тиешле карарлар кабул ителде.
Утырыш барышында Аяз Шәфигуллин депутатларны районда гуманитар йөк машинасын комплектлау һәм чираттагы тапкыр МХО территориясенә йөк җибәрү эшендә кызыксыну һәм ярдәм күрсәтергә чакырды. Ул шулай ук Урыссу поселогы депутатларының игътибарын якын көннәрдә башланачак район җитәкчелеге һәм хезмәтләр җитәкчеләренең район халкы, шул исәптән Урыссу халкы белән очрашуларына юнәлтте.
- Шуңа күрә, - дип ассызыклады Шәфигуллин, - бу җыеннарда депутатларга да катнашу мөһим. Сезгә ышанып тапшырылган сайлау округлары территориясендә урнашкан йортларда яшәүчеләрне нинди сораулар борчый икәнен алдан белергә кирәк. Шулай ук халык конкрет көннәрдә теге яки бу адрес буенча депутатлар гражданнарны кабул итүне кагыйдә итеп алырга тиеш. Электрон мәйданчыкларга – төркемнәргә һәм социаль челтәрләргә генә өмет баглау кирәкми.
Ахырда Шәфигуллин 2023 елның 10 сентябрендә җирле үзидарә органнары депутатларын өстәмә сайлаулар уздырылуын билгеләп үтте. 9 нчы Тукай сайлау округы буенча Федор Миронов сайланды. Шуңа бәйле рәвештә Урыссу шәһәр тибындагы поселогы башлыгы Аяз Шәфигуллин Мироновка Урыссу шәһәр тибындагы поселогы Советы депутаты таныклыгын тапшырды.
Утырыш эшендә депутатлардан тыш район прокуроры Александр Микеркин, район башкарма комитеты җитәкчесе Светлана Самонина һәм аның урынбасарлары, палата рәисләре, бүлек башлыклары һәм ММЧ вәкилләре катнашты.