«Рус җәмгыяте»нең яңа рәисе сайланды

2024 елның 4 апреле, пәнҗешәмбе

Район башкарма комитеты утырышы залында «Рус җәмгыяте» иҗтимагый оешмасының киңәшмәсе узды.

«Ютазы районы милли-мәдәни берләшмәсе рус җәмгыяте»нең җирле бүлекчәсе рәисе Ирина Иванаевская төп көн тәртибе –  рәисне яңадан сайлау мәсьәләсен яңгыратты.

Киңәшмәдә җәмгыять әгъзалары һәм район җитәкчелеге вәкилләре җыелды. Булачак Рәис кандидатуралары турында фикер алышканнан соң, бертавыштан Петр Аськаев өчен тавыш бирәләр.

Петр Алексеевич – районыбызның хөрмәтле кешесе. Хезмәт ветераны, җырлар һәм шигырьләр авторы, «Истоки» халык ветераннар хорында катнашучы.

Җомга, 5 апрельдә, район мәдәният йортында Рус җәмгыятенең хисап җыелышы планлаштырыла, анда яңа рәис рәсми рәвештә игълан ителәчәк һәм җәмгыять әгъзалары яңадан сайланачак.