Урыссуда балалар сәнгать мәктәбе укучыларының отчет концерты узды
Район мәдәният йорты сәхнәсендә Урыссу балалар сәнгать мәктәбе укучылары чыгыш ясады.
Ютазы районында яз – иҗат коллективларының отчет концертларының кайнар чоры. Районыбызда Урыссу сәнгать мәктәбенең талантлы укучылары һәм педагоглары отчет концертларын тәмамладылар. Алар тамашачылар алдында үзләренең концерт номерлары белән чыгыш ясадылар һәм уку елында нәрсәгә өйрәнгәннәрен күрсәттеләр.
Бу чарада сәнгать мәктәбенең барлык бүлекләренең иң яхшы укучылары катнашты. Искиткеч иҗади номерлар тамашачыларга бәйрәм кәефе бүләк итте. Матур музыка, башкаручыларның югары осталыгы һәм артистларның күз явын алырлык костюмнары беркемне дә битараф калдырмады.
Тамаша залы яшь артистларның туганнары, дуслары, укытучылары һәм инструменталь музыка сөючеләр белән тулы иде.
Чарада мәдәният бүлеге башлыгы Рөстәм Абдурахманов катнашты.
Иҗат кичәсе ахырында укучылар, педагоглар һәм актив ата-аналар сәнгать мәктәбе директоры Дмитрий Иванаевскийдан Рәхмәт хатлары белән бүләкләнделәр.