Урыссу 2 нче урта мәктәбенең 5а сыйныфы укучылары район ЗАГСда булдылар
13 ноябрь көнне Урыссу 2 нче урта мәктәбенең 5а сыйныфы укучылары район ЗАГС бүлегенә барырга теләк белдерделәр. Балалар өчен ЗАГСның туй, кияү һәм кәләш белән генә ассоциацияләнүе гаҗәп түгел. Татарстан Республикасы Ютазы муниципаль районы Башкарма комитетының ЗАГС бүлеге башлыгы Гүзәлия Фәхертдинова билгеләп үткәнчә, яшь парларның никахлашуы — ЗАГС эшенең бик аз өлеше генә, тулаем алганда — төрле документлар белән тырышып эшләү.
ЗАГС бүлеге эшчәнлеге белән танышу тере диалог аша барды. Гүзәлия Фәхертдинова ЗАГС органнары барлыкка килү тарихы турында сөйләде, 1926 елдан алып бүгенге көнгә кадәр архивта саклана торган китапларны, эштә кулланыла торган таныклык бланкларын күрсәтте. Балалар туу турындагы актның техник чаралар ярдәмендә бастырылган заманча язмасын күрделәр һәм аны 40-50 ел элек кулдан кара белән язылган архив документлары белән чагыштырдылар. Кайбер балаларга аларның тууы, әти-әниләренең никахлашуы, әби-бабайларының тууы турындагы документаль язманы күрсәттеләр. Шулай ук алар биредә гражданлык хәле актларының нинди төрләре теркәлүен, архивның ничек формалашуын, никахлашу шартларының нинди булуын, үз фамилиясен, исемен яки атасының исемен үзгәртергә теләүчеләргә нәрсә белергә кирәклеген, аталыкны билгеләү һәм уллыкка алу (кызлыкка алу) нәрсә икәнен, алар арасында нинди аерма булуын белделәр. Әңгәмәдә һәр документны имзалау алдыннан игътибар белән укырга кирәклегенә аерым игътибар бирелде.
Укучылар игътибарына ЗАГС бүлегенең тантаналы чараларының фотоматериаллары: күп еллар законлы никахта яшәгән юбилярларны хөрмәтләү, гаилә, мәхәббәт һәм тугрылык көннәре бәйрәмнәре тәкъдим ителде. Чара "мәгариф" һәм "Демография"милли проектларының максатларына һәм бурычларына туры килә.
«Демография» милли проектының төп максатлары арасында — гаилә законнары мәсьәләләрендә белем дәрәҗәсен күтәрү, гаилә һәм хокук культурасы институтын ныгыту, традицион гаилә кыйммәтләрен пропагандалау. РФ Президенты Владимир Путин инициативасы белән илкүләм проектлар 2019 елда старт алды.