Үзәк китапханәдә туган якны өйрәнүгә багышланган чара узачак
Аны «Пушкин картасы» милли проекты кысаларында карарга мөмкин, дип хәбәр иттеләр Ютазы үзәкләштерелгән китапханә системасында.
"26 ноябрьдә «Минем туган ягым һәрнәрсәдә кабатланмас» дип исемләнгән мавыктыргыч программа узачак. Катнашучылар үзләренең кече ватанының тарихы һәм бүгенге тормышы турында беләчәкләр. Программада: төбәк турында мини-лекция, истәлекле урыннарны, табигать ресурсларын, мәдәни кыйммәтләрне, күренекле шәхесләрне һәм әдәбиятчыларны белүгә квест; атлас ленталардан эшләнмәләр ясау буенча мастер-класс; Урыссу һәм Ютазы районы турында китаплар күргәзмәсе һәм документаль фильм күрсәтү. Чараны җирле шагыйрьләрнең шигырьләрен уку тәмамлаячак", - диелә хәбәрдә.
"Пушкин картасы" - Россиядә яшәүче 14 яшьтән 22 яшькә кадәрге яшьләр өчен мәдәни программа. Махсус банк картасы ярдәмендә мәдәни вакыйгаларга билетлар өчен түләргә мөмкин. 2024 елда картаның Номиналы 5 000 сум тәшкил итәчәк, шуның 2 000 сумын программага кертелгән фильмнарга кинотеатр билетларына кулланырга мөмкин. Картаны дәүләт хезмәтләре порталында шәхси кабинет аша рәсмиләштерергә мөмкин. Милли проект 2021 елның августында РФ Президенты Владимир Путин инициативасы белән гамәлгә ашырыла.