Ютазы районында "Туган ягым" дип исемләнгән мәктәп театрлары фестивале узды
Урыссу гимназиясе базасында Бөек Ватан сугышында Җиңүнең 80 еллыгына багышланган "Туган ягым" дип исемләнгән район мәктәп театрлары конкурс-фестивале узды.
Чара Ютазы районының 12 мәктәбен берләштерде, аларның һәркайсы геройлыкка, Ватанга мәхәббәткә багышланган спектакльләрдән өзекләр күрсәтте.
Фестивальдә катнашучылар актерлык осталыгын гына түгел, ә тарихны тирәнтен аңлауларын да күрсәттеләр. Сәхнәдән солдатларның батырлыклары, хәрби балачак тарихы һәм тыл хезмәтчәннәре язмышы турында монологлар яңгырады. Составына педагоглар, мәдәният эшлеклеләре һәм ветераннар кергән Жюри спектакльләрнең оригинальлеген, башкаруның эмоциональлеген һәм тематикага туры килүен бәяләде.
Балалар иҗаты үзәге методисты Гөлчәчәк Вәлиева ассызыклаганча
"Мондый чаралар - буыннар арасында күпер. Иҗат аша балалар бабаларының батырлыгын бәяләргә, ә тамашачылар Җиңүнең нинди бәягә яуланганын истә тотарга өйрәнә. Без сәнгать аша тарихи хәтерне саклауның никадәр мөһим булуын күрәбез".
Конкурс нәтиҗәләре якындагы көннәрдә игълан ителәчәк, әмма хәзер үк билгеле: барлык катнашучылар да тамашачыларга сугыш турындагы дөреслекне җиткерү омтылышында җиңүче булдылар. Иң яхшы номерлар районда Җиңү көненә багышланган тантаналы чараларда күрсәтелергә тиеш.