"Тормыш стиле – сәламәтлек" - файдалы хәбәрләр сәгате
Ел саен 7 апрельдә Бөтендөнья сәламәтлек көне билгеләп үтелә. Бу көн барыбызга да үз иминлегебезне кайгыртуның мөһимлеген, тән һәм рух гармониясенә омтылуны искә төшерә. Бу көнне Үзәк китапханәдә Ютазы районында «Гармония» комплекслы үзәгенең көндезге төркемендә катнашучылар өчен «Тормыш стиле — сәламәтлек» дигән файдалы хәбәрләр сәгате узды.
Рәмзия Ханипова үз сәламәтлеген ничек ныгытырга һәм аңа нинди факторлар йогынты ясавы турында сөйләде. Ул ассызыклаганча, актив һәм сәламәт яшәү рәвеше алып бару, чыныгу, физкультура һәм спорт белән шөгыльләнү, шәхси гигиена кагыйдәләрен үтәү мөһим. Чара барышында катнашучылар сәламәт яшәү рәвеше турында халык мәкальләре һәм әйтемнәре турында фикер алыштылар, шулай ук витаминнар һәм көн режимы турындагы викторина сорауларына җавап бирделәр. Очрашу азагында барысы да сәламәтлек — тормышта төп кыйммәт, һәм кешеләр аны барлык мөмкин булган ысуллар белән сакларга тиеш дигән нәтиҗәгә килделәр.