Урыссу гимназиясе укучысы Илшат Фәйзрахманов экомарафонда катнаша
Гади пластик капкачлардан ул уникаль «Шашка» өстәл уенын булдырган.
Илшат үзенең сыйныфташларына әзер уенны күрсәтеп кенә калмады, аны әзерләү процессы турында җентекләп сөйләде, шулай ук мавыктыргыч мастер-класс үткәрде. Балалар гади, кирәксез кебек тоелган материалларны файдалы һәм кызыклы уенга әверелдереп булуына шаккаттылар.
Шунысы сөендерә: тәнәфесләр вакытында укучылар, «шашка»да көч сынашу өчен, уен кыры артына рәхәтләнеп җыелдылар. Бу проект балаларга ял итү өчен яңа мөмкинлекләр бүләк итеп кенә калмыйча, әйләнә-тирә мохит турында кайгыртуның, гадәтләнгән әйберләргә икенче тормыш бирүнең мөһимлеген күрсәтте.
Илшатның инициативасы күпләрне рухландырды, һәм хәзер гимназиядә яңа уеннар һәм кул эшләре булдыру өчен пластик капкачлар җыюны оештырырга ниятлиләр. Мондый алым иҗатны, экологияне һәм команда рухын берләштерә, мәктәп тормышын тагын да күңеллерәк һәм аңлырак итә.