Бизнес өлкәсе белән бәйле кешеләрнең бәйрәмен билгеләп үтәбез
Эшмәкәр көне - башкаларга товарлар яки хезмәтләр сатучы кешеләрнең бәйрәме. Аны ел саен 26 майда билгеләп үтәләр, ул 2007 елда Президент Указы белән билгеләнгән.
Ютазы районы эшмәкәрләре үзләренең һөнәри бәйрәмнәрендә районның социаль-мәдәни объектларында булдылар: «Атлант» яшүсмерләр-яшьләр клубында, районның тарих-туган якны өйрәнү музеенда, яңа төзелгән ябык теннис манежында, Бәйрәкә авылында «Гобәйдия» музеенда, «Дубравушка» балалар сәламәтләндерү лагеренда булып, анда катнашучылар рәсми булмаган шартларда үзара аралаша, спорт уеннарында катнаша алдылар һәм тәмле пылау авыз иттеләр.
Эшмәкәрләрне һөнәри бәйрәмнәре белән Ютазы районы Башкарма комитеты җитәкчесенең беренче урынбасары Зөлфия Гыйбадуллина котлады. Хәзерге дөньяны кече һәм урта бизнестан башка күз алдына да китереп булмый. Безнең районда 380 эшмәкәр, 108 юридик зат — кече һәм урта бизнес субъектлары, 1436 кеше үзмәшгуль. Тулаем территориаль продуктта КУЭ субъектлары өлеше 30% тан артык тәшкил итә.
Эшмәкәрләрнең хезмәте икътисадның барлык тармакларында да сизелә, эшмәкәрләр социаль проблемаларны хәл итүдә актив катнашалар, киң күләмле хәйрия эшчәнлеге алып баралар, Россия эшмәкәрлегенең иң яхшы традицияләрен дәвам итеп, үз тәҗрибәләрен һәм иҗади энергияләрен район үсешенә кертәләр.
Эшмәкәр Ленар Насыйров билгеләп үткәнчә: "Бәйрәм җылы, дустанә атмосферада узды, чараның программасы мавыктыргыч һәм файдалы булды, формаль булмаган аралашу команданы берләштерде һәм уңай хис-кичерешләр уятты. Бу безгә якынрак булырга, җайга салынып эшләргә һәм бизнеста яхшы мөнәсәбәтләрне сакларга ярдәм итәчәк"
«Нәтиҗәле һәм конкурентлы икътисад» милли проектының максатлары — икътисадны, финанс базарын, конкуренцияне үстерү, эшмәкәрлеккә ярдәм итү, хезмәт җитештерүчәнлеген һәм инвестиция активлыгын арттыру, шулай ук әйләнә-тирә мохиткә тискәре йогынтыны киметү. Икътисадның сәнәгать секторлары перспективаларына, югары технологияләргә һәм яшьләр бизнесына аерым игътибар бирелде. Яңартылган милли проектлар РФ Президенты Владимир Путин карары буенча 2025 елдан гамәлгә ашырыла.