Сабантуйга бүләккә – йомырка җыям чиләккә
Районның Сабан туе алдыннан Урыссу бистәсе урамнары буйлап сабан бәйрәме якынлашуын хәбәр итүче күңелле һәм шаян хәбәрчеләр узды.
Гадәттәгечә, татар милли киемнәреннән район мәдәният йорты хезмәткәрләренең халкыбыз яраткан җырлары, "Ай, рәхмәт!” дип сөрән салулары халыкның игътибарын мәҗбүр итте. Район артистлары “Сөрән җыю" чарасына кушылырга чакырды халыкны, бала-чагаларны. Гореф-гадәтнең асылы, элеккечә, халыктан бәйрәмгә яхшы бүләкләр җыюдан бигрәк, йоланың үзен саклаудан гыйбарәт. Бу үзенә күрә бер борынгы бабаларыбыз кабызган утны саклау. Шуны да әйтергә кирәк, «халкыбыз» дигәндә татар милләтеннән булган кешеләр генә түгел, гомер-гомергә бер авылда, шәһәрдә, бистәдә тату һәм иңне-иңгә куеп яшәгән башка милләтләр дә күздә тотыла. Ә сабан, игенчелек белән безнең район халкы - татарлар, чуашлар, марилар, удмуртлар, башкортлар ишетеп кенә таныш түгел. Чәчү тәмамлану шатлыгы һәр кеше өчен тирән мәгънәгә ия. Бу - авыл хуҗалыгы елының бер чорын тәмамлау. Алда – уңыш үстерү белән бәйле бурычларны хәл итү. Шытымнар бердәм үсеп китсен өчен, ашлама, рәт арасын эшкәртү, химик утау, корткычларга каршы үз вакытында көрәшү һәм уңайлы һава шартларына – җылы яңгырларга, ә урак вакытында коры һава торышына даими өмет итү кирәк. Ә әлегә, чәчүдән соң, бер көнне Сабантуйга да багышларга була. Бәйрәм колгасы инде Урыссу халкының чәчәкле яулыкларыннан сыгыла, район артистларының күңеленә күтәренке рух салынган. Бары тик бергәләп Сабантуйны бәйрәм итәсе, тантананың төп каһарманнарына – көн саен хезмәтләре белән илнең азык-төлек сәясәтен үтәүгә булышлык иткән, табындагы яңа пешкән икмәк шатлыгы белән тормышыбызны ямьләгән игенчеләргә һәм терлекчеләргә баш иясе генә кала.
Тулырак: https://yutazy.ru/news/%D2%97%D3%99mgyiyat/sabantuiga-bulakka-iomyrka-yiam-cilakka