Яңартылган мәктәпләргә – хыял артыннан!
Районыбызда ике яңартылган мәктәп – Ютазы һәм Урыссу 2нче мәктәбе- ишекләрен ачты.
Белемгә омтылыш бирүче, һәртөрле сәләтләргә ачылырга ярдәм итүче һәм якты хыялларны гамәлгә ашыручы урын булырга тиеш ул гыйлем учаклары.
26 август көнендәге тантаналы ачылыш укучылар, укытучылар һәм районның барлык халкы өчен дә чын бәйрәмгә әверелде.
Яңа уку елы алдыннан Ютазы районы искиткеч бүләк – үз укучыларын уңайлы һәм заманча шартларда каршыларга әзер булган, капиталь ремонтланган ике мәктәпне кабул итеп алды. Болар – Урыссуның 2нче һәм Ютазы мәктәпләре. Уку сыйныфлары, башлангыч мәктәп блогы, остаханәсе ремонтланган һәм җиһазландырылган Ютазы мәктәбендә аеруча җанлылык хөкем сөрә иде.
Тантаналы ачылышта район башлыгы Аяз Әдип улы Шәфыйгуллин, башкарма комитет җитәкчесе Светлана Самонина һәм башка мәртәбәле кунаклар катнашты.
1 сентябрьдә үк Урыссуның 2нче мәктәбе 318 укучыны кабул итәчәк. Мәктәп директоры Нина Якимова зур горурлык хисе белән кунаклар өчен экскурсия үткәрде, яңартылган бинаны күрсәтте. Ютазы авылы мәктәбендәге капиталь ремонт шулай ук белем учагына яңа сулыш өргән. Яңартылган бина, төзекләндерелгән стеналар һәм түшәмнәр, заманча сыйныф бүлмәләре, уйланылган дизайн бизәлеше – болар барысы да тырышып укуга һәм һәрьяклап үсешкә уңайлы шартлар тудыра.
Республика олимпиада үзәге директоры Гөлнара Исламова, педагогларның август киңәшмәсе кысаларында мәктәпләр ачылышында булганның соңында, җиһазларның югары сыйфатын билгеләп үтте: "Казанның күп кенә мәктәпләрендә сездәгечә җиһазлар юк әле. Монда чын күңел биреп эшлисе дә эшлисе! Биредә бик күп талантлы балалар, район һәм республиканың лаеклы гражданнары тәрбияләнер, дип ышанам".
Укытучыларны яңа уку елы башлану уңаеннан котлап, район башлыгы Аяз Шәфыйгуллин Урыссудагы барлык мәктәпләр дә ремонтланып һәм заманча җиһазландырылып бетте, дип ассызыклады. Янә дә ул билгеләп үткәнчә, быел мәгариф автопаркы яңа автобуска тулыланды, ул 25 торак пункттан 389 баланы йөртергә мөмкинлек бирәчәк.
Шатлыклы очрашу иң яхшы район педагогларын яуланган югары казанышлары өчен бүләкләү тантанасы белән тәмамланды.
Педагогларның август киңәшмәсе эше турында тулырак материалны гәзитнең киләсе санында укырсыз.
Тулырак: https://yutazy.ru/news/m%D1%92garif/ianartylgan-maktaplarga-xyial-artynnan