Ютазылылар Республика көнен һәм Урыссу бистәсе көнен зурлап билгеләп үттеләр
30 август көнне - Урыссу бистәсе бәйрәм рухына күмелә.
«Энергия» стадионында алма төшәр урын да юк — район халкы һәм кунаклар берьюлы ике мөһим вакыйганы - Татарстан Республикасы көнен һәм Урыссу бистәсе көнен билгеләп үтәргә җыелдылар.
Стадионга якынлашканда ук инде күтәренке кәеф сизелә. Шашлык һәм шаурма исләре сәүдә рәтләренә тарта, биредә бай бәйрәм программасы алдыннан тамак ялгап була. Күңел ачу мәйданчыклары балаларны да, өлкәннәрне дә чакырып тора.
Әмма төп тамаша, һичшиксез, стадион кырында җәелгән масштаблы хореографик композиция булды. Районның иҗат коллективлары һәм солистлары Татарстандагы тормышның матурлыгын һәм күпкырлылыгын синхрон рәвештә, бердәм омтылыш белән күрсәттеләр. Артистларның биюдә республика тарихын сөйләүләрен, игенчеләрнең хезмәтен, яшьләрнең укудагы һәм эштәге уңышларын күрсәтүләрен тамашачылар сокланып карадылар.
Бәйрәмнең тантаналы өлешен Ютазы районы башлыгы Аяз Шәфигуллин ачып җибәрде. Ул якташларын истәлекле даталар белән котлады, район һәм республика казанышларын билгеләп үтте. Котлауларга Дәүләт Советы депутаты Камил Гыйльманов та кушылды.
Рәсми өлешнең кульминациясе бүләкләү тантанасы булды. Күпьеллык нәтиҗәле хезмәтләре һәм республика алдындагы казанышлары өчен иң яхшылар билгеләп үтелде. «Фидакарь хезмәт өчен» медале белән Ютазы муниципаль районының Финанс-бюджет палатасы рәисе Руфия Мөхәммәтова бүләкләнде. «Ана даны — Материнская слава» медале алты бала анасы Рабига Адаловага тапшырылды. Мәгариф бүлеге башлыгы Сергей Абрамовка «Татарстан Республикасының атказанган укытучысы» дигән мактаулы исем бирелде. Социаль хезмәткәр Оксана Афанасьева «Татарстан Республикасының Атказанган халыкны социаль яклау хезмәткәре» исеменә лаек булды. Бу көнне лаеклы бүләкләр алучыларның бик аз өлеше генә. Бүләкләү тантанасын Башкарма комитет җитәкчесе Светлана Самонина һәм район башлыгы урынбасары Зәкуан Ильясов дәвам итте.
Рәсми өлештән соң бәйрәм матур концерт программасы белән дәвам итте. «Ютазы йолдызлары» үрнәк бию ансамбле, «Кичке җыр», «Монсар» ансамбльләре солистлары, шулай ук Октябрьскийдан «DICE BOX» заманча бию ансамбле үзләренең энергетикасы һәм башкару осталыгы белән тамашачыларны таң калдырды.
Кичә Уфадан «ТриСКА» кавер-төркеме һәм Татарстанның атказанган артисты Рифат Зарипов чыгышлары белән тәмамланды. Ә концерттан соң барысын да бәйрәм дискотекасы көтте, ул чын күңелдән биергә һәм гомуми шатлык атмосферасы белән ләззәтләнергә мөмкинлек бирде.
Бу көн Урыссу һәм бөтен Ютазы районы өчен чын бәйрәмгә әверелде. Ул тагын бер тапкыр республикабызның матурлыгы һәм байлыгы, аның данлы тарихы һәм якты киләчәге турында искә төшерде.