Ютазылылар халыкара «Татарча диктант» чарасына кушылды
Районда Каюм Насыйриның тууына 200 ел тулуга багышланган халыкара чара узды.
Күләмле, бөтен дөнья буйлап татар телен саклап калу һәм үстерүгә омтылган меңләгән кешене берләштергән "Татарча диктант – 2025" чарасыннан Ютазы районы да читтә калмады. Быел күренекле мәгърифәтьче Каюм Насыйриның тууына 200 тулуга багышланган бу чара аеруча күләмле узды. Безнең районда диктантны мәгариф һәм мәдәният оешмаларында, шулай ук хакимияттә яздылар.
Башкарма комитетның киңәшмәләр залында район җитәкчелеге вәкилләре, Каюм Насыйриның танылган "Кабуснамә" әсәреннән өзек буенча диктант язып, үз белемнәрен тикшерде. Текстны Татар конгрессының төбәк бүлекчәсе рәисе Лилия Гарәева укыды.
Шунысы куанычлы, диктант язуда барлык бүлекләрнең, хезмәтләрнең диярлек җитәкчеләре һәм авыл җирлекләре башлыклары катнашты. Аларның катнашуы үсеп килүче яшь буынга үрнәк, чөнки чарага байтак кына яшьләр дә кушылды.
Онлайн-форматта язырга теләүчеләр өчен ТНВ телеканалы өч көн дәвамында диктант яздыру трансляциясен оештырды.
"Диктант язу белән кызыксынучылар даими арта, димәк, ватанпәрвәрлек, туган телгә мәхәббәт хисе дә ныгый", - дип билгеләде аппарат җитәкчесе Марьяна Вәлиуллова. Аның сүзләренә караганда, диктант тексты, тарихи нигездә булуына карамастан, искергән сүзләр урынына заманча синонимнар куллану нәтиҗәсендә аңлаешлы иде.
Татарстан һәм Башкортстан өчен текстлар охшаш булды, бу әлеге төбәкләрдә, Россиянең башка территорияләре һәм чит илләр белән чагыштырганда, татар телен белүнең югары дәрәҗәдә булуын ассызыклый.
Тулырак: https://yutazy.ru/news/cara/iutazylylar-xalykara-tatarca-diktant-carasyna-kusyldy