«Россия спорты» дәүләт программасы кысаларында Татарстанда «Яңа елда ГТО – ГТО теләкләрне үти» республика онлайн-акциясе уза
Аның максаты - балаларны һәм яшьләрне спорт һәм физик культура белән шөгыльләнүгә җәлеп итү, волонтерлык эшчәнлеген активлаштыру, шулай ук Яңа ел алдыннан үзара ярдәмләшү һәм игелек традицияләрен саклап калу.
Акция ике этапта уза: 24 ноябрьдән 12 декабрьгә кадәр. Беренче, муниципаль этапта катнашучыларга кыска видеоролик булдырырга тәкъдим ителә, анда аларның кемнеңдер Яңа ел теләген үтәүләре яки хәйрия ярдәме күрсәтеләчәк. Бу теләсә нинди ярдәм булырга мөмкин: хуҗалыкта ярдәм итү (мәсәлән, утын яру, азык-төлек сатып алу), волонтерлар катнашуы һәм балаларга, өлкәннәргә яки сәламәтлеге мөмкинлекләре чикле кешеләргә юнәлдерелгән башка игелекле эшләр.
Видеоролик бер минуттан да артык дәвам итмәскә тиеш. Төшерүдә икедән артык кеше катнаша алмый. Кадрда ГТО символикасы һәм Яңа ел атрибуты (чыршы, гирлянда, бәйрәм язулары һ.б.) булу, шулай ук барлык куркынычсызлык чараларын үтәү мәҗбүри шарт булып тора.
Әзер роликны «ВКонтакте» социаль челтәрендә үз муниципаль районының «ГТО» ВФСК рәсми битендә урнаштырырга кирәк.
10 декабрьгә кадәр һәр муниципалитет иң яхшы бер эшне сайлап алачак һәм аны конкурсның оештыру комитетына җибәрәчәк, анда җиңүчеләрне билгеләячәкләр. Барлык призерлар да ВФСК ГТОдан дипломнар һәм истәлекле бүләкләр алачак.