Ютазы районында Боз сарае булачак
Район башкарма комитетының утырышлар залында район башлыгы Аяз Шәфигуллин, Башкарма комитет җитәкчесе Светлана Самонина һәм Башкарма комитет җитәкчесенең инфраструктура үсеше буенча урынбасары Александр Захаровның территориаль иҗтимагый үзидарәләр (ТИҮ) рәисләре белән эшлекле очрашуы булды.
Чара 2025 елда район территориясендә төрле проектларны гамәлгә ашыру һәм башкарылган эшләр нәтиҗәләрен ачык итеп күрсәткән видеоролик күрсәтүдән башланды. Александр Захаров җәмәгать эшлеклеләре эшчәнлегенә кайбер нәтиҗәләр ясады һәм грант программаларында активрак катнашырга өндәде, бу локаль проблемаларны хәл итүдә һәм ишегалды территорияләрен яхшыртуда нәтиҗәле корал булып тора. Район башлыгы Аяз Шәфигуллин, җыелганнарга мөрәҗәгать итеп, ТИҮләрнең муниципалитет тормышына керткән өлешенең әһәмиятен ассызыклады.
- Районда 32 ТИҮ бар, бу район һәм йортлар белән идарә итүче оешмалар өчен гаять зур көч. Сезнең урыннарда эшләвегез, халык белән турыдан-туры элемтәгез - дөрес карарлар кабул итү өчен нигез, - дип билгеләде ул.
Очрашуда 2026 елга планнарга аерым игътибар бирелде. Күпфатирлы йортларга газ үткәргеч линияләрне оптималь ераклыкка чыгару белән бергә капиталь ремонт ясау өстенлекле урында. Александр Захаров рәисләргә әлеге мөһим мәсьәләләр буенча биредә яшәүчеләр белән аңлату эшләре алып баруны сорап мөрәҗәгать итте. Киләсе елга төп проектлар арасында шулай ук түбәндәгеләр аталды: район мәдәният йортында 400 урынлык концерт залы төзү, Балалар иҗаты үзәген капиталь ремонтлау, юл эшләре һәм башкалар. Әлегә ТР Министрлар Кабинеты карарын таләп итә торган ачык мәсьәләләр дә кала, аерым алганда, Урыссуның 4нче балалар бакчасын һәм «Энергия» стадионын капиталь ремонтлауга кагылышлы. Ә якын киләчәктә, 2027 елда, Урыссу бистәсендә Боз сараен төзи башлау планлаштырыла.
Очрашуның икенче өлеше куркынычсызлыкның актуаль мәсьәләләренә багышланды. Район җитәкчелеге җәмәгатьчеләрнең игътибарын кибермошенниклык проблемасына җәлеп итте. Узган ел Ютазы районында IT-җинаятьчеләр гамәлләреннән 57 кеше зыян күргән, зыянның гомуми суммасы 15 миллион сумнан артып киткән. ТИҮ рәисләрен, халыкны, бигрәк тә өлкән буынны, акча югалтудан саклап калу өчен, бу борчулы мәгълүматны һәр йортка җиткерергә чакырдылар.
Балалар куркынычсызлыгы темасы да игътибарсыз калмады. Яшүсмерләрнең акыллары еш кына деструктив интернет-мәйданчыкларда оста «программалаштырыла», һәм бу проблема ныклы игътибар таләп итә, дип билгеләп үтелде.
Очрашу барышында ТИҮ рәисләре үзләрен борчыган сорауларны турыдан-туры район җитәкчелегенә һәм тормыш тәэмин итү хезмәтләре җитәкчеләренә бирделәр һәм аларга тулы җаваплар алдылар.
Тулырак: https://yutazy.ru/news/infrastruktura/v-iutazinskom-raione-byt-ledovomu-dvorcu