Ел укытучыларына фанфаралар яңгырады

"Ел укытучысы" бәйгесе кысаларында агымдагы уку елында районыбызда тагын тәрбиячеләр, укытучы-китапханәчеләр һәм класс җитәкчеләренең профессиональ бәйгеләре узды. Бер-берсе белән ярышта һәм жюри әгъзалары алдында укытучы һәм тәрбиячеләр үзләренең професииональлекләрен күрсәттеләр. Иҗади уңышлар, яхшы укучылар һәм, гомумән, иң изге теләкләр генә юллап район башкарма комитеты җитәкчесенең социаль мәсьәләләр буенча урынбасары Ильдар Хаҗиев, районның мәгариф бүлеге начальнигы Гүзәлия Фәхертдинова, уку эшләре буенча начальник урынбасары Фәйрүзә Сәлимова һәм башкалар чыгыш ясадылар.  Чәчәкләр һәм алкышлар, грамоталар һәм бүләкләр, җырлар һәм шигырьләр, бүләккә сертификатлар һәм елмаю - бу көнне укытучы һәм тәрбиячеләргә бүләккә бирелгәннең бик азы гына. Шулай, "Ел укытучысы-2014" бәйгесенең абсолют җиңүчесе булып 3 санлы Урыссу мәктәбенең инглиз теле укытучысы Гөлшат Касимова чыга. "Ел тәрбиячесе - 2014" бәйгесенең  җиңүчесе - Ютазы "Кояшкай" балалар бакчасы тәрбиячесе Зөлфия Зарипова билгеләнә. "Сыйныф җитәкчесе- 2014" булып Урыссу гимназиясенең башлангыч сыйныфлар укытучысы Эльвира Маслова кала.  Укытучы-китапханәчеләр арасында әле һаман да җиңүчеләр билгеле булмаса да, аларның өчесенә дә бүләкләр бирелде һәм алкышлар яңгырады. Моннан тыш сәхнәгә тагын "Укытучы - тормыш иминлекләре укытучысы" һәм "Яшел ут" бәйгеләрендә җиңүчеләр дә күтәрелделәр. Бәйге азагында профсоюз оешмалары рәисе Валентина Орехова бәйгеләрдә җиңүче калган укытучы һәм тәрбиячегә Идел елгасында ике көнлек круизга путевка тапшырды. Сүз уңаеннан: барлык җиңүчеләр дә әлеге ярышларның зона этапларында катнаштылар. Шулай, Зөлфия Зарипова "Ел тәрбиячесе - 2014" зона ярышларының да абсолют җиңүчесе булган.