"Сабан туй Гүзәле-2014"

Кичә район мәдәният йортында "Сабан туй Гүзәле-2014" бәйгесе узды. Әлеге бәйге районыбызда беренче тапкыр уздырыла. Чараның инициаторы булып Бөтендөнья татар конгрессының "Ак калфак" оешмасы тора. Ютазы районындагы җитәкчесе Минзилә Абдурахманова. Бәйгедә районыбызның иң чибәр, зифа, акыллы биш татар кызы катнашты. Кызларга өч этапта үс сәләтләрен күрсәтергә кирәк иде: "Үзем турыда - үзем", "Әти-әни күрегез, ничек сәләтле сезнең кызыгыз" һәм "Сорау-җавап". Кызлар бер генә этапта да сынатмадылар. Ә шулай да бәйге булгач җиңүчеләр дә була. Урыссу татар гимназиясеннән чыгыш ясаган Багауова Регина, Бәйрәкә урта мәктәбеннән чыгыш ясаган Гүзәл Мөхәметдинова, Ютазы урта мәктәбеннән чыгыш ясаган кызлар Шиһәпова Гүзәл һәм Мокъсинова Альбина төрле дәрәҗәдәге мактау исемнәренә лаек булсалар, Урыссуның өченче санлы мәктәбеннән Шәфигуллина Ралина "Сабан туй гүзәле-2014" исеменә лаек дип табылды. Кызларның барысы да агымдагы елгы Сабантуенда район башлыгы белән бергә батырларны һәм кыр алдынгыларын тәбрикләп йөриячәкләр!!!