Бүген иң беренчеләрдән булып Бәйрәкә авыл җирлегендә Сабантуй бәйрәме узды.

Бүген районыбызда иң беренчеләрдән булып Бәйрәкә авыл җирлегендә халкыбызның милли бәйрәме Сабантуй бәйрәме шаулап-гөрләп узды.  Бәйрәмгә авылдашлар җыелудан тыш ерак араларны якын итеп кайткан кунаклар да күп килгән иде. Кыр батырларын тәбрикләп чыгыш ясаган район башлыгы Рөстәм Нуриев аларга язгы чәчү эшләрен уңышлы тәмамлаганнары өчен рәхмәт сүзләре җиткерде. Агро-Мир җәмгыяте җитәкчесе Сирин Галиев батырларына чиксез рәхмәтен җиткереп бүләкләрен өләште. Бәйрәм кызганнан кыза торды. Уеннар артыннан уеннар уйналды, җиңүчеләрне тәбрикләделәр. Мәйдан уртасында Казан шәһәреннән килгән артистлар чыгыш ясаса, икенче яктарак сабантуйның бизәге булган көрәш бара иде. Кыр батырына бүләк суыткыч һәм тәкә үз батырын күптән көтә инде. Олысы да, кечесе дә, балалар да рәхәтләнеп, чын күңелдән ял иттеләр.