Бүген бөтендөнья автомобильсез йөрү көне!!!

Казан Россиядә, Мәскәүдән кала, Бөтендөнья автомобильсез йөрү көнен югары дәрәҗәдә билгеләп үтәчәк икенче шәһәр булачак. Бу хакта бүгенге эшлекле дүшәмбе вакытында Казан Мэры Илсур Метшин җиткерде.

Татарстан башкаласы җитәкчесенә Берләшкән Милләтләр Оешмасы (ООН) вәкилләре шундый тәкъдим белән чыккан. UNDP (United Nations Development Programme) исемннән язылган хатта Бөтендөнья автомобильсез йөрү көненең һәм Европа мобильлеге атналыгының максаты булып җәмәгать һәм моторлаштырылмаган транспорт төрен популярлаштыру тора.
Бөтендөнья автомобильсез йөрү көне (World Car Free Day) 22-нче сентябрьдә билгеләп үтелә. Әлеге традиция 1998 елда Франциядә барлыкка килә. Ул елда әлеге көнне ике дистәләп кенә шәһәр билгеләп үтә. Бүген исә әлеге хәрәкәт бөтен дөньяда хуплана. Акция кысаларында автомобильчеләргә бер көн шәхси машиналарын кулланмаска тәкъдим ителә, әлеге темага багышланган төрле чаралар оештырыла.
“Миңа ООН вәкилләреннән әлеге проектны бездә дә булдыру буенча рәсми тәкъдимле хат килде. Без аны кабул иттек. Мәскәүдән соң, Казан әлеге проектны тормышка ашыра торган Россиядәге икенче шәһәр булачак. Тәҗрибә күрсәткәнчә, әлеге юнәлештәге адымнар билгеле бер нәтиҗәләргә китерә”, - дип билгеләде Илсур Метшин һәм халыкара инициативага багышланган чаралар программасын эшләргә кушты.
Шәһәр башлыгы эшлекле сезон һәм яңа уку елы башлану бөкеләр проблемасын янә актуальләштерде, шулай да ситуация узган елгыга караганда күпкә яхшырак, дип билгеләп үтте. Әлеге нәтиҗәләрне РФ ЭЭМ-нең Казан буенча ЮХИДИ идарәсе башлыгы Рөстәм Ибраһимов та раслады.
“Агымдагы елда Казан урамнарындагы ситуация тотрыклы һәм алдагы еллардагы проблемалар күзәтелми. Моңа транспорт чишелешләрен эксплуатациягә тапшыру да булышлык итте. Шулай да кайбер участокларда хәрәкәт тыгызлыгы күзәтелә”, - дип билгеләде Рөстәм Ибраһимов. Шулай ук ул Татарстан башкаласында вертолеттан күзәтеп чыгу дәвам ителгәнлеген сөйләде, бу исә урамнарда үткәрү мөмкинлеген тәэмин итү эшчәнлегенең төп юнәлешләрен билгеләргә булышачак. Вертоллеттан күзәтеп чыгу нәтиҗәләре буенча, аерым алганда, Вишневский, Достоевский, Чуйков урамнарында һәм Әмирхан проспектындагы светофорлар режимы эшчәнлегенә үзгәрешләр кертү буенча мәсьәләләр эшләнелә.
Илсур Метшин искәртеп узганча, 2009 елда Россиядәге иң зур Санкт-Петербург транспорт-инфраструктурасының фәнни-тикшеренү институтлары Казандагы транспорт инфраструктурасының 2020 елга оптималь үсеш прогрпаммасын эшләгән, шуның бер өлеше транспорт планы буларак Универсиадага әзерлек вакытында тормышка ашырылган.
“Әлбәттә, шәһәрдәге хәрәкәт өчен шартлар берничә тапкырга яхшырды. Бу 2013 елгы Универсиада алдыннан эшләнелгән траспорт планының беренче этабын тормышка ашыру белән бәйле. Әлегә планлаштырылганнарның өчтән берен генә тормышка ашыра алдык. Автомобильләр саны ел саен арта, юлларның югары дәрәҗәдәге үткәрүчәнлек мөмкинлеге мәсьәләсе алга таба да игътибар үзәгендә булырга тиеш”, - дип билгеләде һәм әлеге мәсьәләләрне җәмәгать транспортының ролен үстермичә тормышка ашырып булмаячаклыгын ассызыклап үтте Илсур Метшин.