"Олимпта" зур ярыш узды

Узган шимбә, 8 ноябрь көнне "Олимп" спорт-сәламәтләндерү комплексынең спорт мәйданчыгы җиңел атлетика буенча ярышларда катнашырга дип бик күп шәһәрләрдән килгән егет-кызлар өчен спорт мәйданчыгына әйләнде. Бу көнне  Халыклар бердәмлеге көненә багышланган "РегионПоставка" ҖЧҖ призларына җиңел атлетика буенча Бөтенроссия ярышлары узды. Уруссуга үзебезнең ярышчылардан кала Азнакай, Бөгелмә, Баулы, Бугуруслан, Нефтекамск, Агыйдел, Туймазы, Дүртөйле, Уфа, Стәрлетамак, Ишимбай, Яңаул, Благовещенск шәһәрләреннән ярышчылар килде. Ярышларда катнашучыларны районның спорт, яшьләр эшләре буенча бүлек начальнигы Светлана Пройдакова сәламләде. Аларга уңышлы җиңүләр һәм әлбәттә инде финиш сызыгын беренче булып узуларын теләп калды. 
Бу көнне йөгерү юлы күпләр өчен җиңел бирелмәде. Җиңүчеләр дә, җиңүгә омтылучылар да бар иде. Әмма бу көнне җиңелүчеләр турында язасы килми. Ютазы җиңел атлетлары арасында җиңүчеләр булмау - бу әле җиңелү дигән сүз түгел, ә бары тик яңа җиңүләргә ясарга омтылу дигән сүз генә.