"Илһам чишмәләре" ветераннар төркеменең иҗат концерты узды.

Узган атнада район мәдәният йорты сәхнәсендә "Илһам чишмәләре" ветераннар төркеменең иҗат концерты узды. Коллективта төрле елларда төрле җитәкчеләр булуга да карамастан, алар берничә ел сәхнәдә күренми тордылар, һәм менә ниһаять агымдагы елда, мәдәният елы кысаларында, аларга яңа җитәкче билгеләнде. Ул - Рәхмәтуллина Зөлфия. Коллектив белән Зөлфия җитәкчелек итә башлаганан бирле, алар иҗат дөньясында кайный. Төрле концертларда чыгышлар ясыйлар һәм менә үзләренең иҗат концертларын да әзерләгәннәр. Коллективтагы артистларны районный мәдәният бүлеге җитәкчесе Алсу Хөсәенова тәбрикләде, аларның һәрберсенә яңадан-яңа иҗат уңышлары теләп дипломнар һәм бүләкләр тапшырды. Кызлар-егетләр үзләре дә сынатмадылар. Сәхнәдә әле шигырь сөйләделәр, әле җыр яңгырады, әле бию, хәтта фокус күрсәтүчеләр дә булды. Концерттан һәркем күтәренке кәеф белән таралышты.