Элеккеге тракторчы Рәсиха әби

Иске Урыссу авылында дөньяга килгән Рәсиха Фәйзелхакова озын һәм җиңел булмаган тормыш юлы узган кеше.  Сугыш елларында, авылдагы ир-атлар фронтка китеп беткәч, тракторга утыручылар калмый һәм яп-яшь кызга тракторны үз кулларына алырга туры килә. Озын-озак тормыш юлында аңа пешекче һәм идән юучы булып эшләргә дә туры килә. Сугыштан соң ул Исмәгыйль исемле егеткә кияүгә чыга, бергә алар ике ул һәм бер кыз тәрбияләп үстерәләр. Кызганычка каршы Расихә апага тормыш иптәшен генә түгел, ә ике улын да җир куенына салырга туры килә, әмма Ходай Тәгалә бер яраткан кешесен алган булса, икенчеләрен бирә торган. Аның куанычы булып бүген җиде оныгы һәм 12 оныкчыгы үсеп килә. 

  Бүген Рәсиха апа яраткан кызы тәрбиясендә гомер кичерә, ә юбилеен  яраткан киленнәренең берсендә каршылый. Әлеге матур көнне туганнарыннан кала юбилярны районның социаль яклау бүлеге начальнигы Джанна Волкова, Дим-Тамак авыл җирлеге башлыгы Марс Ямалеев, район ветераннар советы әгъзасы Рәсимә Камалетдинова, авыл җирлегенең ветераннар советы рәисе Ринат Әхмәдышин тәбрикләделәр.  Рәсиха апага караганнан соң аңа бу яшьне бирү бик авыр. Якыннарын югалту кайгысы һәм сугыш елларына да карамастан ул әле яшь һәм мөлаем.