Урыссу химия заводында эшләп, хәзерге вакытта лаеклы ялда булган сигез ветеранга Бөек Җиңүнең 70 еллыгына багышланган юбилей медальләрен тапшырдылар.

Бүген район башлыгы урынбасары Зәрия Рәшитова, башкарма комитет җитәкчесе Андрей Подовалов, Урыссу химия заводының генераль директоры Николай Лукин Урыссу химия заводында эшләп, хәзерге вакытта лаеклы ялда булган сигез ветеранга Бөек Җиңүнең 70 еллыгына багышланган юбилей медальләрен тапшырдылар. Әйе, ветераннарыбыз елдан-ел олыгаеп бара. Әмма район тарафыннан күрсәтелгән игътибар, хөрмәт аларга хәзер элеккедән дә ныграк кирәк, дип билгеләп узды районның ветераннар советы рәисе Зоя Глушкова. Ветераннарны котларга килгән җитәкчеләр аларга тазалык-саулык, җан тынычлыгы, әле тагын озак еллар безнең арада яшәүләрен теләп Татарстан Республикасы лидеры Рустам Миннеханов hәм район башлыгы Рустем Нуриев исеменнән азык-төлек пакетлары тапшырдылар.