Һәлак булучыларга һәм тереләргә – дан һәм рәхмәт хисләре белән

Район җитәкчелеге һәм халыкны социаль яклау бүлеге Чернобыль АЭСында авария ликвидаторлары белән очраштылар. Очрашу Радиацион аварияләрдә һәм һәлакәтләрдә һәлак булучыларны искә алу көне уңаеннан уздырылды.

Җыелучылар алдында район башлыгы урынбасары Зәрия Рәшитова, кеше хокуклары буенча вәкаләтле вәкил ярдәмчесе, районның иҗтимагый советы рәисе Рима Муллагалиева, ветераннар советы рәисе Зоя Глушкова чыгыш ясадылар. Алар, авария нәтиҗәләреннән арындыруда катнашкан ватандашларыбыз аркасында җирдә кешеләр яши, дип билгеләп үттеләр. Без үзләре өстенә әлеге гарасат авырлыгын алган ликвидаторларның батырлыгы һәм ихтыяры алдында баш иябез. Чернобыль АЭСын авария нәтиҗәләреннән арындыруга 3000нән артык татарстанлы җибәрелгән, шул исәптән, 42 кеше – безнең районнан. Күп кенә якташларыбыз хәзер исән дә түгел, районда чернобыльчеләр утызлап кеше калган. Бүген район җитәкчелеге аларга төрлечә ярдәм күрсәтергә тырыша, торак шартларын яхшырту мәсьәләсен хәл итә. Яшәү шартларын яхшыртуга мохтаҗ булган кешенең алтысы инде фатир алган, икесе быел тораклы булачак. Түгәрәк өстәл артында чернобыльчеләр бер-берсе белән иркен халәттә аралаша, ул вакыттагы вакыйгаларны һәм аларның нәтиҗәләрен искә ала алдылар. Чарада үзләренең музыкаль номерларын район мәдәният йорты артистлары күрсәтте. Ахырда җыелучылар һәлак булганнарны бер минутлык тын калу белән искә алдылар. Очрашудан соң һәр ликвидатор обелиск янына чәчәкләр салды.
Тарихтан. 1986 елның 26 апрелендә Чернобыль АЭСында дөньядагы иң зур атом-төш һәлакәте була. Дүртенче энергоблоктагы авария нәтиҗәсендә ректорны юкка чыгарган шартлау була. Авария вакытында ЧАЭСта 134 кеше эшли, аларның 28е - нурланыштан беренче берничә ай дәвамында һәлак була. Авария нәтиҗәләреннән арындыруда 800 меңнән артык кеше катнаша. “Табиблар атом-төш сугышына каршы” халыкара оешмасы уннарча мең ликвидаторның авария корбаннары булуын, ә һавага радиоактив матдәләр ташлануы аркасында 10 меңнән артык баланың гомере өзелүен раслый. 2003 елдан башлап, бу көн, БМО Генассамблеясе карары белән,Радиацион аварияләрдә һәм һәлакәтләрдә һәлак булучыларны искә алу көне буларак билгеләнеп үтелә.