Утыз елга беренче ремонт

Район үзәгенең Урыссу урамындагы 19 санлы йортта чын мәгънәсендә зур вакыйга – биредә агымдагы ремонт эшләре бара.

Җәмәгатьчелектә ремонт, төзекләндерү кебек сүзләр еш яңгыраган мәлдә, кайбер кешеләрдә моның нәрсәсе соң шул кадәр шаккатмалы дигән сорау туарга мөмкин. Утыз елга беренче тапкыр ремонт ясалуын гына исәпкә алсак та, бу беренче үзгәлек түгелме? Йорт файдалануга 1985 елда тапшырылган һәм шул көннән соң монда бер генә тапкыр да ремонт кермәгән, дип сөйли Идарә итү компаниясе директоры Закуан Ильясов. Йорт белән идарә итүче оешма, стеналарны элекке буяулардан тазартып, акшарлау һәм буяу эшләре алып бара, шулай ук подъездларда култыксалар яңартыла. Беренче подъездда ремонт тәмамланган, бары тик чарлак люгын тиешле тәртипкә саласы, керә торган ишеккә доводчик һәм почта ящикларын гына урнаштырасы калган. Инде биредә якты һәм күңелле. Анатолий Лыков сүзләре буенча, подъезддагы иске тәрәзәләрне дә яңага алмаштырып җибәрсәң... Адәм баласы шулай яратылган инде – яхшы булган саен яхшыракка өмет итә. Әңгәмәдәшем сүзгә саран булмады. Ни өчен халык арасында бу йорт “исерек” дигән кушамат белән йөрүенә дә аның белән җавап таптык:
- Үз вакытында бу йортка ике барак халкын күчерделәр. Ул торак йортлар хәзер инде бистәдә юк. Ул чордагы “эш кешесе”, производствода гына тырышып эшләп калмыйча, кичләрен дә яхшы “ял итә” белгән, күрәсең. Яңа йортта яши башлаган халыкның күңелле һәм шау-шулы гамәлләре аркасында әлеге йорт шулай дип аталган да. Хәер, бу кешеләр хәзер безнең арада юк инде...
Биредә исерек кешеләр хакта да күзгә чалынмады, ә менә йортның үзгәрүе күзгә ташланып тора. Бүген ремонт эшләре икенче подъездда бара. Яшәүчеләрнең саклап һәм кайгыртып торуы бәрабәренә аның, яман кушаматларыннан арынып, үрнәк-күрсәтмә йортка әверелүе дә бик ихтимал.